23 junio, 2024
Un total de 4 cacharelas, 16 cacharelas con sardiñadas, 16 sardiñadas en espazos públicos e outras 630 cacharelas en zonas privadas foron autorizadas polo Concello de Santiago para a súa celebración neste fin de semana de San Xoán.
As cacharelas públicas sen sardiñada terán lugar nos seguintes emprazamentos: praza de Salvador Parga, praza 8 de marzo, praza da Pescadería Vella e na rúa Antón Vilar Ponte. As cacharelas con sardiñada realizaranse na carballeira de San Lourenzo, praza da Cruz de San Pedro, rúa José Antonio Souto Paz, no barrio de Santa Marta a carón das pistas xunto á Escola Infantil, rúa Pelamios, campo de festas de Marrozos, campo de Conxo, lugar da Peregrina, rúa Virxe Branca, campo da festa de Figueiras, praza Celso Emilio Ferreiro, rúa Irmán Santos Varela, praza da mestra Victoria Míguez, paseo da Quinta, Cortos-Marantes e Monte de Deus. Ademais, tamén se concederon autorizacións para a realización de sardiñadas sen cacharela noutros puntos da cidade.
NORMAS
As persoas organizadoras deberán coidar os arredores e coñecer os números de teléfono dos Bombeiros (080) e de Emerxencias (112). Se a propiedade está en zona urbana, o volume do combustible da cacharela non excederá os 2 metros de diámetro e 6 metros de perímetro, nin un metro de altura. No caso da zona rural, a cacharela non excederá os 3 metros de diámetro ou 9 de perímetro, nin os 3 metros de altura.
A separación entre as cacharelas, edificios, árbores, vehículos e mobiliario urbano será como mínimo de 12 metros, agás no casco urbano. Porase atención en afastar a fogueira de vivendas, vehículos, instalacións e locais onde se almacenen produtos inflamables ou baixo tendidos eléctricos ou telefónicos. Prohíbese a queima de neumáticos, plásticos, espumas de poliuretano, aceites e calquera substancia que desprenda fume tóxico ao arder, así como de recipientes que conteñan líquidos inflamables ou gases a presión (sprays), aínda que estean baleiros.
A fogueira deberá permanecer vixiada polos solicitantes ata a súa total extinción, asegurando que os restos sexan empapados completamente con auga e as cinzas queden totalmente apagadas. No caso de que se levante vento que poida dificultar a vixilancia e extinción da fogueira, esta deberá suspenderse ou apagarse de inmediato.
A hora límite para rematar a celebración é as 03:30 horas da madrugada, sendo obrigatoria a limpeza do espazo autorizado ao remate da actividade.
Neste senso, a Concellaría de Mobilidade, Convivencia e Centros Socioculturais vén de asumir a prestación do servizo de execución das conexións eléctricas para a celebración de actividades recreativas promovidas por comisións de festas, asociacións veciñais e culturais. O departamento que dirixe Xan Duro procura, desta maneira, facilitar a tramitación das autorizacións para eventos como as cacharelas e sardiñadas de San Xoán.