11 junio, 2024
A 19ª Conferencia da Academia Internacional de Psicoloxía Investigativa (International Academy of Investigative Psychology) chegará á Facultade de Psicoloxía de Compostela desde o mércores 12 ata o venres 14 de xuño, un evento no que os participantes abordarán, entre outros asuntos, o uso da intelixencia artificial para mellorar as entrevistas forenses con vítimas infantís, as pegadas dixitais deixadas polos traficantes de persoas e as formas de afrontar as ciberagresións serán algúns dos temas tratados
A inauguración terá lugar este mércores ás 9.00 horas no Salón de Actos da Facultade, coa participación dos profesores David Walsh e David Canter. Nas primeiras sesións, Walsh falará sobre a entrevista de investigación, mentres que Canter explicará a elaboración de perfís xeográficos e o desenvolvemento da análise espacial. A inauguración oficial será ás 15.00 horas e contará coa presenza de Donna Youngs, John Synnott e Paulo Barbora Marques, acompañados polo profesor de Dereito Penal e Criminoloxía da USC, Gumersindo Guinarte, en representación do Instituto de Criminoloxía da Universidade de Santiago de Compostela.
Neste senso, a aplicación das novas tecnoloxías na investigación psicolóxica para a loita contra o crime e o cibercrime, así como a actualización de métodos de investigación, serán algúns dos eixos principais deste encontro internacional. O evento ofrecerá conferencias plenarias, sesións de pósteres e sesións de traballo ao longo de tres días, nos que se presentarán novidades sobre a abordaxe da violencia doméstica, a avaliación psicolóxica forense, a ciberviolencia e o ciberacoso, así como os timos coñecidos como phishing, co fin de proporcionar a mellor atención psicolóxica posible ás vítimas.
Xa o venres, a clausura oficial da Conferencia terá lugar ás 13.30 horas, pero as sesións prácticas continuarán entre as 14.00 e as 18.00 horas. A primeira sesión estará a cargo do profesor da Facultade de Psicoloxía de Compostela, Ramón Arce, que analizará a avaliación do dano psicolóxico aplicando técnicas forenses. Jodi Quas mostrará as mellores prácticas nos interrogatorios a vítimas e testemuñas adolescentes. A última sesión estudará a violencia de xénero facilitada pola tecnoloxía, analizando o perfil das vítimas, a autoría e o feito criminal, a cargo de María José Garrido, Lidia Alonso Corona, Neus Mascaró Coll e Laura Sánchez Morón, da Secretaría de Estado de Seguridade.