14 junio, 2024
Hoxe, 14 de xuño celébrase o Día Nacional das Linguas de Signos Españolas, motivo polo que a praza do Obradoiro acolleu un acto onde se deu lectura a un manifesto, evento promovido pola Asociación de Persoas Xordas de Santiago de Compostela xunto con representantes de todos os grupos municipais: Míriam Louzao (BNG), María Rozas (CA), Olaya Otero (PP) e Sindo Guinarte (PSdG), xunto coa presidenta da entidade, Fátima Granja.
O manifesto foi lido pola presidenta da Asociación de Persoas Xordas de Santiago, Fátima Granja, e recorda que «existen miles de linguas no mundo. Linguas que perviven e conviven para garantir o pleno desenvolvemento das comunidades lingüísticas e as culturas coas que se identifican. Linguas que se len, que se escriben, que se falan, que se signan. Que reforzan a diversidade lingüística da nosa sociedade e a enriquecen. Linguas diferentes con idéntico valor.»
Este destaca que, a pesar dos avances, «as persoas xordas seguimos atopando barreiras que atentan contra a nosa dignidade e nos limitan» tanto «en materia de emprego», no «acceso á información» como no «ámbito educativo», e fai un chamamento «aos diferentes gobernos para que asuman a súa responsabilidade no que á protección e promoción das linguas de signos españolas se refire».
Por todo isto, o texto apela a «impulsar medidas de accesibilidade lingüística que garantan que calquera persoa xorda poida exercer de maneira libre o seu dereito a usar a lingua de signos, a recibir educación en lingua de signos, ou a ser atendida en lingua de signos» e a «fomentar actitudes de respecto á diversidade que nos permitan elixir de maneira libre, sen imposicións nin restriccións de ningún tipo, como comunicarnos» polo que é «necesario sumar esforzos» xa que «o futuro das nosas linguas e a súa prosperidade dependen do apoio que se lles brinde».
O Consello de Ministros estableceu hai 10 anos o 14 de xuño como Día Nacional das Linguas de Signos Españolas, coincidindo co mesmo día de 1936 no que se constituiu a Confederación Estatal de Persoas Xordas, principal axente catalizador na defensa do dereito a usalas e aprenderlas.