Santiago anuncia a creación dunha cociña central municipal para os comedores escolares

A concelleira de Educación, Míriam Louzao, presidiu este xoves a primeira xuntanza do Consello Municipal de Educación para o curso 2024-2025, na que se presentou o proxecto para a creación dunha cociña central municipal destinada aos comedores escolares. Esta iniciativa busca mellorar a calidade alimentaria e pedagóxica dos centros educativos, apostando polo produto local e de quilómetro cero.

COCIÑA CENTRALIZADA

Na reunión, celebrada no Auditorio de Galicia, Louzao anunciou a intención do Goberno local de construír unha cociña central nunha nave de titularidade municipal, xa que ningún dos actuais centros educativos conta coas condicións adecuadas de dimensión e accesibilidade para albergar unha cociña deste tipo. Este novo modelo de comedores escolares forma parte dunha estratexia para converter o servizo en algo máis que un lugar de alimentación, incorporando unha visión pedagóxica que fomente hábitos saudables e o consumo de produtos locais.

O proxecto foi definido tras a elaboración dun estudo técnico que avaliou as instalacións dos CEIP do concello, co obxectivo de analizar o estado e a viabilidade da creación dunha cociña nun destes centros. O informe considera que a construción dunha nova cociña central permitirá ofrecer un servizo máis eficiente e de mellor calidade, ao tempo que promoverá a sustentabilidade e a economía local.

MELLORAS

Durante a xuntanza, Míriam Louzao tamén anunciou que o Goberno local, ao longo de 2025, realizará un diagnóstico das necesidades dos espazos de comedor nos CEIP de Santiago. Este estudo permitirá mellorar a accesibilidade e eliminar barreiras arquitectónicas, co fin de crear espazos máis amigables e integradores para as crianzas.

Louzao destacou a importancia de facer dos comedores escolares un lugar educativo que fomente a socialización e a aprendizaxe, ademais de garantir unha alimentación saudable. Entre as actuacións previstas, figura a mellora do acondicionamento acústico do comedor do CEIP Apóstolo Santiago.

OUTRAS ACTUACIÓNS

Ademais de anunciar o proxecto de cociña central, a concelleira informou das intervencións realizadas durante o verán en varios CEIP do concello, como parte do plan de mantemento ordinario dos centros. Entre os traballos previstos para os próximos meses están o acondicionamento de parcelas próximas ao CEIP Quiroga Palacios e Ramón Cabanillas, co fin de crear máis prazas de aparcamento.

Finalmente, Louzao adiantou a actualización do mapa escolar municipal, unha ferramenta clave para analizar os fluxos demográficos e planificar a creación de novos centros de ensino, así como para fortalecer a seguridade nos camiños escolares.