Rueda visita O Son do Camiño a poucas horas do seu inicio

En vísperas do arranque do festival O Son do Camiño, que inicia mañá a que é xa a súa quinta edición, o presidente galego Alfonso Rueda decidiu realizar este mediodía unha visita ás instalacións dun Monte do Gozo que acollerá entre este xoves e o vindeiro sábado a uns 40.000 asistentes.

Así, Rueda destacou o festival como unha ferramenta para poñer Galicia “no top da música europea e internacional”, así como que se trata dunha cita que contribúe a levar a propia «marca Galicia” , vencellada ao Xacobeo, por todo o mundo.

Así, o titular do executivo fixo fincapé na importancia deste festival á hora de atraer visitantes á comunidade cunha elevada taxa de ocupación hoteleira. “Son tres días para desfrutar e nos que Galicia vai estar posta no mapa a través da música”, resaltou.

Esta cita, precisamente, levará sobre o seu escenario a artistas como Green Day, Love of Lesbian, Baiuca, Pet Shop Boys, Melendi, Ana Mena, Myke Towers, J Balvin ou Thirty Seconds to Mars.