20 junio, 2024
O Mercado das Alfaias chegará o próximo mércores á Praza Roxa, unha proposta que busca poñer o foco no consumo ecolóxico de proximidade e que está impulsado pola asociación Nonéomesmo e o Sindicato Labrego Galego, co apoio da Concellaría de Dereitos e Servizos Sociais, Promoción Económica e Xuventude. Esta iniciativa contará coa participación dunha ducia de produtores de Santiago e concellos como Brión, Vedra, Boqueixón, A Estrada, Negreira e Boiiro, así como con degustacións de petiscos de restaurantes colaboradores, palestras e música ao vivo.
A concelleira de Dereitos e Servizos Sociais, Promoción Económica e Xuventude, María Rozas, presentou hoxe o Mercado das Alfaias nunha rolda de prensa na que tamén participou Lolo Rey, en representación da asociación Nonéomesmo. A tenenta de alcaldesa explicou que o obxectivo desta iniciativa «é reivindicar o traballo dos produtores, dos labregos e labregas, e a calidade dos seus produtos, das súas froitas e verduras, que teñen un valor inmenso desde o punto de vista económico, pero tamén desde o punto de vista social e ambiental». Rozas subliñou que «é preciso apostar por un consumo responsable, pola soberanía alimentaria, e por modelos de produción que tamén son resilientes fronte ao cambio climático».
Así, segundo o dicionario da Real Academia Galega, as alfaias son «obxectos de adorno persoal, pero tamén persoas ou cousas de excelentes calidades». Esta definición encaixa perfectamente cos alimentos labregos ecolóxicos e locais. De aí a denominación deste mercado, que se celebrará o 26 de xuño, desde as 11.00 ata as 14.30 horas e no que, ademais, colaborarán os restaurantes Bellaco e La Alacena de Cris, que ofrecerán petiscos saudables feitos con produtos ecolóxicos e locais.
O mercado completarase con palestras sobre a importancia da produción local de alimentos e con música ao vivo de Kedirán.
Lolo Rey animou a visitar o Mercado das Alfaias, non só aos consumidores, senón tamén a aquelas persoas que poidan ver na produción agraria unha opción de futuro. «Precisamos apoiar aos labregos e labregas, unha actividade á que non podemos renunciar porque é a que coida e fixa poboación no rural, e é a que garante a protección do medio ambiente», afirmou.