Presentado o programa do Día das Letras Galegas en Santiago

Redacción

A capital compostelá sumarase ás celebracións con motivo do Día das Letras Galegas a través de diversas iniciativas, entre as que destaca a campaña, recentemente presentada, «Andei por Santiago/pisando estrelas», coa que se pretende convidar á veciñanza a compartir en redes sociais os seus recunchos favoritos de Compostela ao mesmo tempo que se pon en valor a figura da poeta Luísa Villalta, homenaxeada na edición deste ano.

Foi a rexedora Goretti Sanmartín a encargada de presentar esta iniciativa, recordando á súa vez que a poeta, ensaísta e narradora «mantivo unha vinculación importante coa cidade de Santiago» e por este motivo o Concello quere unirse a esta celebración das letras lanzando esta campaña que fai referencia ao verso co que a autora comeza un dos seus poemas alude » a diferentes lugares pols que adoitaba pasar ou teñen unha especial significación para ela».

Goretti Sanmartín explicou que desde o pasado venres 10 de maio, están nas rúas unhas estrelas co texto ‘Andei por Santiago/pisando estrelas’, «onde nós lle engadimos ao final ‘e ti?'» para implicar ao conxunto da veciñanza pedíndolle «que publiquen nas redes sociais unha imaxe dun lugar de Compostela onde utilicen os hashtags #AndeiPorSantiago e #PisandoEstrelas, acompañados dunha explicación do lugar escollido», sinalou a acaldesa, que sinalou que existirán sorteos de material cultural para os participantes da proposta.

Ademais, a alcaldesa recordou que nesta semana tamén se fará unha lectura pública dunha declaración institucional aprobada coa unanimidade polo Pleno do Concello, nun acto que terá lugar o 16 de maio ás 11 horas na praza do Obradoiro e que, ademais da Corporación municipal, contará coa participación das escritoras Marga Romero e Esperanza Mariño que lerán unha escolma da obra poética de Luísa Villalta.

Por outra banda, o Concello tamén ofrecerá ao longo do mes de maio varios paseos guiados sobre Compostela e as orixes da lingua con 12 paradas «que permitirán descubrir como naceu o galego e aspectos relevantes en canto ao léxico, á pronuncia, ao status social e a diversidade do desenvolvemento do idioma».

O Teatro Principal tamén acollerá o 16 e 17 de maio ás 20.30 horas, o espectáculo «Made in Galiza», a cargo de Sarabela Teatro sobre o texto de Séchu Sende.Unha obra dirixida por Fina Calleja e cun elenco conformado por Fernando Dacosta, Sabela Gago, Elena Seijo e Josito Porto.

O mesmo lugar tamén acolle o evento «Ritos de resistencia», un recital multidisciplinar con poesía, música e imaxe que ten como eixo central os poemas de Luísa Villalta, no que Participarán a poeta e comunicadora Eva Veiga, ao tempo que os músicos Bernardo Martínez (percusión e xoguetes musicais) e Fito Ares (frauta e saxo soprano) interactúan de forma instantánea coa palabra a través dos instrumentos se proxectan imaxes realizadas do artista Alfonso Costa. Esta función será o sábado 18 de maio ás 20:30 horas e pódense retirar os convites na Zona C, en compostelacultura.gal e na billeteira do Teatro Principal.

Tamén os Centros Socioculturais participarán nesta celebración do Día das Letras Galegas co obradoiro de creación literaria «Escribirmos na compaña de Luísa Villalta», que será impartido por Marga do Val e con sesións a cargo de Cristal Méndez Queizán e de Miro Villar. Trátase dunha iniciativa da Escola de Escritores e Escritoras en Lingua Galega (AELG) que conta co apoio da Deputación da Coruña e coa colaboración do Concello de Santiago. Estes obradoiros impartiranse os sábados 20 de abril; 4, 11 e 25 de maio; e 1, 8, 15 e 22 de xuño de 2024, de 10:30 a 13:00 h.

Así, Goretti Sanmartín fixo un chamamento a toda a veciñanza reiterando que «o mellor que podemos facer para difundir a nosa lingua e apostar pola nosa literatura é falala e ler a obra de escritoras e escritores pero sobre todo a autora á quen se lle dedica as letras», porque ademais «a obra de Luísa Villalta é moi contemporánea e actual e que chega facilmente á mocidade».