Pilar Pereira, lenda do teatro galego e orgullo compostelá, xa conta coa súa praza en Santiago

A actriz e dramaturga compostelá Pilar Pereira xa conta cun novo espazo en homenaxe á súa figura na capital galega. Veciña da rúa da Troia e orgullosa dunha orixe picheleira que reivindicou ao longa da súa diltada carreira profesional, que comezou aos 10 anos, e que a levou por escenarios galegos e internacionais como Francia, Bélxica e América Latina, Pereira dará agora nome ao espazo situado na Cidade histórica entre a rúa e ruela da Oliveira, que pasará a chamarse oficialmente «praza da Oliveira-Pilar Pereira”.

A propia alcaldesa de Santiago, Goretti Sanmartín, acompañada de representantes da Corporación municipal e do tecido social e cultural compostelán, participaron nun acto no que esta destacou a intención de que, a través destapraza, Pilar Pereira permaneza “na memoria colectiva da veciñanza compostelá e que, ao igual que esta oliveira, enraíce neste lugar coa mesma forza coa que viviu e desempeñou a súa traxectoria profesional”, en palabras da rexedora.

Así, segundo explicou durante a súa intervención Sanmartín, esta viña sendo a “praza da Oliveira” por transmisión oral, mais este nome a partir de hoxe pasa a ser oficial, quedando inscrito na placa que vai identificar formalmente este espazo, mais tamén nos rexistros documentais.

Unha denominación que se rexistra acompañada polo nome da actriz e dramaturga compostelá Pilar Pereira, que, en palabras da rexedora, «sempre presumiu de ser picheleira aquí e en todos os lugares de fóra onde traballou e viviu durante diferentes momentos da súa vida”, ademais de ser unha referencia para o teatro deste país, non só pola súa participación en proxectos coa maioría das compañías e profesionais das últimas décadas, “senón tamén por abrir portas e camiños para as intérpretes e dramaturgas das xeracións que viñeron tras dela, que son as xeracións de intérpretes e dramaturgas do presente, as que triunfan a día de hoxe e das que tan orgullosas nos sentimos”.

«A escolla desta praza para darlle o nome de Pilar Pereira implica, dunha banda, incrementar a presenza das mulleres nos nomes do rueiro e doutra, optar por espazos centrais da cidade coma este, que forma parte da améndoa, do corazón mesmo, da zona histórica para lle dar visibilidade e recoñecemento», destacou o Concello compostelán a través dun comunicado.

Nesta liña, a alcaldesa quizo destacar que a praza está nun lugar moi próximo ao que foi unha das sete portas de entrada na cidade, “como as artes escénicas foron no seu momento porta de entrada a espazos de loita e de liberdade”, nun espazo que se presenta máis como un lugar de encontro e recollemento que como un lugar de tránsito, cunha fisionomía do espazo que mesmo lembra a disposición dun teatro ao aire libre.

Pilar Pereira foi unha muller “que quixo exercer a súa vida en liberdade, nunha época en que as mulleres non o tiñan nada doado, unha pioneira que reivindicou a creación artística desde a mocidade ata os últimos anos”, afirmou Goretti Sanmartín.

PILAR PEREIRA

Nada en Santiago de Compostela en 1937, Pereira é todo un referente no mundo teatral e audiovisual galego. Premio de Honra Marisa Soto en 2013, na súa traxectoria cóntanse fitos como a gravación no ano 1960 de poemas de Rosalía de Castro. O seu nome está ligado tamén á primeira representación en galego do TEU (Teatro Español Universitario) de Santiago, que en 1958 representou Antígona nunha tradución de Xosé Manuel Beiras, Franco Grande e Xosé Ramón Silva.

Na súa extensa carreira pcompartiu escenarios e proxectos con profesionais do talle de Fernando Arrabal, Paco Rabal, Juan Diego, Paco Ibáñez, Maximino Fernández Queizán, Roberto Vidal Bolaño ou Quico Cadaval.

Na década de 1990, no seu regreso definitivo a Galicia, crea a súa propia compañía e escribe obras coma a exitosa “Ofelia, sen a virtude do pudor”, que se representou durante nove anos.

.