O Vero Boquete prepárase para a reforma «máis ambiciosa» da súa historia

Vai cobrando forma o proxecto de reforma integral para o Estadio Municipal Verónica Boquete. Situado no barrio de San Lázaro, o proxecto contempla un investimento de 9,3 millóns de euros co «ambicioso» obxectivo de converter a Compostela «na capital do deporte» a medio e longo prazo.

A concelleira de Deportes, Pilar Lueiro, presentou esta mañá en rolda de prensa este proxecto de reforma integral para o Estadio. O primeiro paso desto mesmo será a reforma das cubertas do estadio, cunha dotación de 850.000 euros achegada pola Deputación da Coruña. Este compromiso foi obtido pola alcaldesa, Goretti Sanmartín, na reunión que mantivo o pasado venres 6 de xuño na sede da institución provincial.

«Despois de 30 anos en funcionamento, esta importante infraestrutura municipal precisa ser rehabilitada en varios aspectos», destacou Lueiro, reivindicando que é a primeira vez en tres décadas que un goberno local fai unha aposta decidida a medio e longo prazo para unha reforma completa do estadio que arrancará coa mencionada actuación na cuberta do recinto, que o Concello considera como unha necesidade «prioritaria».

Lueiro salientou tamén a existencia de entidades deportivas locais que están agardando pola dispoñibilidade de espazos no estadio, que non poden ser ofertados debido á falta de reparacións, polo que as obras e actuacións previstas teñen como un dos seus principais obxectivos poder cumprir coas necesidades destas entidades.

Na súa intervención, a concelleira mostrouse «optimista» co proxecto e agardou o compromiso do resto das administracións, tal como se fixo no inicio (froito dun convenio entre o Concello, Xunta e Consello Superior de Deportes), subliñando a importancia de «colocar» o estadio «na posición que lle corresponde» como «infraestrutura punteira». «A ese mesmo espírito de colaboración apelamos coa presentación deste plan», que o Goberno local tamén quere presentar á Xunta e ao Estado, para o cal xa remitiu sendas peticións de reunións.

Neste senso, Luerio defendeu un plan que aspira a converter San Lázaro-Fontiñas «nun auténtico referente da práctica físico-deportiva de Compostela», que «nos permita consolidar o noso concello como capital do deporte».

«O proxecto inclúe actuacións de 1,2 millóns de euros para a rehabilitación da envolvente (fachada, cuberta e soportais); 3,1 millóns para intervencións en espazos deportivos e outros; 2 millóns para o plan de autoprotección, que inclúe catro fases; e 2,8 millóns para acondicionamento. O total do plan, no que o Goberno municipal insiste en que é preciso que se impliquen o resto de administracións, ascendería a 9,37 millóns de euros», sinalou o Concello a través dun comunucado.

Ademais da cuberta e a fachada, xorde a necesidade deadaptar as instalacións á normativa actual de accesibilidade e seguridade, así como actuacións para renovar o equipamento deportivo e adaptar tanto o céspede como as pistas atléticas. Finalmente, é preciso tamén a reurbanización da contorna do estadio para converter o complexo no lugar de referencia para o deporte municipal ao aire libre.

Cunha superficie interior de 29.916 metros cadrados e exterior de máis de 75.000 metros cadrados, o estadio municipal conta con capacidade para 12.111 persoas sentadas. O terreo de xogo de herba natural ten 105 metros de longo e 68 de amplo. A pista de atletismo rexistra 400 metros de desenvolvemento. O estadio foi deseñado no ano 1990 polo arquitecto Andrés Fernández Albalat Lois e inaugurado en xuño de 1993. O 30 de outubro de 1989, o Concello de Santiago, a Xunta e o Consello Superior de Deportes asinaron o convenio para a construción desta infraestrutura e impulsar o deporte compostelán e galego.