O turismo internacional continúa gañando peso en Santiago

Os establecementos hoteleiros de Compostela rexistraron 358.774 estadías nos catro primeiros meses do ano, un lixeiro incremento respecto das 356.032 do mesmo período do ano pasado, segundo datos do INE. Este novo máximo histórico no primeiro cuadrimestre reflicte o «proceso de desestacionalización da demanda dos últimos anos», según sinalou o Concello compostelá.

Así, o turismo internacional acumulou 157.832 estadías nestes catro meses, un aumento do 10% respecto ao ano pasado. En contraste, o turismo doméstico reduciuse un 5%, pasando de 212.181 estadías no primeiro cuadrimestre de 2023 a 200.942 este ano.

O crecemento do turismo internacional, combinado coa diminución do turismo doméstico, resultou nun incremento do seu peso no total da demanda turística da cidade. Así, o turismo internacional pasou de representar o 40% da demanda no primeiro cuadrimestre do ano pasado ao 44% este ano.

«Os datos do INE do primeiro cuatrimestre van na liña da transformación do modelo turístico da cidade que se persegue dende o Concello, apostando tanto pola desestacionalización como polo turismo internacional, que aporta maior valor engadido ao conxunto da cidade en tanto que os turistas internacionais teñen en xeral un gasto medio superior aos turistas domésticos», sinalan dende Raxoi.

En abril, o turismo internacional alcanzou as 79.254 estadías, un crecemento do 15% respecto a abril do ano pasado, superando amplamente as 56.601 estadías do turismo doméstico no mesmo mes. Este é o mellor dato de turismo internacional nun mes de abril na serie histórica do INE.

Nesta liña, as cifras dos catro primeiros meses deste curso coinciden co incremento do tráfico no aeroporto de Santiago – Rosalía de Castro e co número de Compostelas entregadas, ambos en máximos históricos.