O simposio ‘Malestares na cultura espec(tac)ular: perspectivas críticas desde a psicanálise’ chegará a Santiago este xuño

O simposio ‘Malestares na cultura espec(tac)ular: perspectivas críticas desde a psicanálise’, organizado polo Grupo de Estudos Audiovisuais da Facultade de Ciencias da Comunicación de Compostela, terá lugar os días 12 e 13 de xuño. O evento abordará as crebas das subxectividades contemporáneas desde un enfoque interdisciplinar que, partindo do campo psicanalítico, integrará a análise audiovisual, a crítica filosófica e a orientación clínica.

Francisco Conde, psicanalista e profesor de Filosofía na USC, abrirá o simposio o mércores 12 cunha conferencia titulada ‘O triunfo do imaxinario lacaniano: do Edipo ao selfie’. Ese mesmo día, a psicanalista Rosa Vázquez analizará o rexistro do simbólico e a súa decadencia no ámbito da clínica de orientación psicanalítica, na súa palestra titulada: ‘A orientación lacaniana no século XXI: decadencia do simbólico, novas modalidades do síntoma e clínica do exceso’.

A segunda sesión, o xoves 13, comezará coa intervención da profesora Antía López, membro do Grupo de Estudos Audiovisuais, quen presentará o relatorio ‘A tiranía da beleza e a máscara dixital nas redes sociais’, onde examinará as transformacións da identidade no contexto audiovisual virtual. O simposio será pechado por Delmiro Rocha, docente da Facultade de Humanidades da USC e filósofo especializado na crítica da cultura e na noción de deconstrución formulada por Jacques Derrida, coa súa intervención titulada ‘O malestar non é o que pensas. Freud e a cultura’.

A asistencia ao simposio, que se desenvolverá na Facultade de Ciencias da Comunicación, será libre ata completar a capacidade do espazo. Non obstante, prégase inscrición previa a través do formulario accesible na web do simposio, ata o luns 10 de xuño.