O centro sociocultural Aurelio Aguirre de Conxo e a Casa das Asociacións de Cornes serán os escenarios de tres obradoiros de música urbana organizados pola Fundación SGAE, en colaboración coa Concellaría de Centros Socioculturais. Esta actividade forma parte do programa «Barraca XXI», co que a Fundación SGAE conmemora o seu 125 aniversario promovendo a cultura e a acción social en colectivos sensibles e espazos vulnerables. O proxecto, que se desenvolve en sete cidades españolas, en Santiago centrarase na saúde mental mediante unha colaboración co Hospital Psiquiátrico de Conxo e a Asociación Itínera.
O concelleiro Xan Duro destacou o valor desta iniciativa, que comparte a filosofía da rede de centros socioculturais como impulsora da vida comunitaria. Salientou a importancia do Hospital Psiquiátrico de Conxo na sensibilización e normalización da saúde mental e destacou a colaboración co SGAE como unha oportunidade para ofrecer actividades atractivas a públicos que poden ter dificultade para acceder a recursos culturais.
Patricia Blanco, coordinadora da Fundación SGAE, explicou que os obradoiros están orientados a utilizar o talento dos socios da SGAE para fomentar a transformación social, especialmente en relación coa socialización e normalización de persoas con trastornos mentais. Blanco subliñou que estas actividades buscan superar barreiras emocionais e físicas, facendo especial fincapé en romper prexuízos sobre a saúde mental.
OBRADOIROS
Os tres obradoiros de música urbana previstos dentro do proxecto Barraca XXI desenvolveranse entre o 20 de setembro e finais de outubro:
Obradoiro de Creación Musical: Impartido por Pauliña, artista cambadesa recoñecida polo seu compromiso e creatividade. Terá lugar os días 20 e 27 de setembro e 5 de outubro no centro sociocultural Aurelio Aguirre.
Obradoiro de Rimas e Hip Hop: Dirixido por García M.C., un referente do hip hop en Galicia con máis de vinte anos de experiencia. Este obradoiro realizarase os días 4, 11 e 19 de outubro tamén no centro sociocultural Aurelio Aguirre.
Obradoiro de Producción Musical: A cargo de Berto, un artista que aborda temas de saúde mental na súa música. Desenvolverase os días 22, 23 e 24 de outubro na Casa das Asociacións de Cornes.
Os tres obradoiros son de balde, pero requiren inscrición previa que se pode realizar desde hoxe no CSC de Conxo, chamando ao teléfono 981 528740. Haberá prazas reservadas para persoas vinculadas ao Psiquiátrico de Conxo e participantes no proxecto Barraca XXI.
