O Hotel Costa Vella celebra o seu 25 aniversario no entorno singular que ofrece o seu emblemático xardín

Este serán, o Hotel Costa Vella acollía na súa terraza un evento moi especial, o seu 25 aniversario. Os irmáns José Antonio e Ana Liñares e Roberto Sousa celebraron un evento privado para agradecer o seu apoio e confianza a clientes, provedores e veciños. O convite celebrouse na emblemática terraza do hotel, unha das máis apreciadas da cidade. Un xardín dunha fermosura particular que mestura distintos tipos de plantas e espazos creando un entorno único e irrepetible, coidado polos propios donos.  

Pouco podían sospeitar os irmáns José Antonio e Ana, cando xogaban de pequenos en fronte do portalón desta singular propiedade, que varias décadas despois estarían a celebrar o 25 aniversario do seu primeiro hotel boutique.  

De familia con tradición hostaleira, a andaina dos dous irmáns comeza coa volta de seus pais, os ben coñecidos Preciosa e don Pepe, da emigración. En 1974 instalábase así toda a familia en Compostela, collendo o traspaso da residencia de estudantes Moure; á que anexionan na década seguinte o Moure 2, ambos na rúa Loureiro.  

Foto de Familia cos Propietarios do Hotel Costa Vella. Imaxe: cedida.

Dúas décadas despois, en 1999, os irmáns abrían as portas do Hotel Costa Vella ofrecendo un servizo exclusivo e converténdose nun dos primeiros negocios composteláns en empregar a idea do hotel boutique. Son eles mesmos os primeiros en namorarse das características desta propiedade singular que agora cativa tanto a turistas como a poboación local: a muralla medieval, as galerías cunhas exclusivas vistas á zona monumental e, entre todo iso, a salvaxe beleza do xardín, que disputa o título da terraza máis fermosa da cidade.  

José Antonio destaca así o valor que xera un patrimonio como este. “Non é mérito noso, creouno a cidade e nós estamos moi contentos de poder mantelo durante todo este tempo” engade emocionado.  

Tras a xubilación de Preciosa e Don Pepe en 2008, colleron o relevo das dúas residencias, reconverténdoas tamén ao concepto de hotel boutique. “Decidimos perder volume para gañar en calidade” explica José Antonio.  

Ambiente na Festa 25 Aniversario do Hotel Costa Vella 23. Imaxe: cedida.

O Moure convértese así nun hotel contemporáneo de 15 habitacións onde a innovación e a tecnoloxía van da man do deseño, a arquitectura e o descanso. O Moure 2, agora hotel Altair, segue a filosofía xaponesa wabi-sabi para ofrecer un espazo exclusivo que mantén o perfecto equilibrio entre a tradición e as tendencias.