15 mayo, 2024
A Concellaría de Dereitos e Servizos Sociais certificou a súa colaboración coa Asociación Fonte da Virxe de familiares e amigos de persoas con enfermidade mental, a través do convenio que tanto a edila María Rozas como a presidenta da entidade, Mar Piñeiro, veñen de firmar. Así, en virtude deste acordo, o Concello achegará á asociación 5.000 euros para o desenvolvemento de diferentes actividades, o que suporá unha aportación 1.500 euros máis que en anos anteriores.
Nesta liña, a concelleira de Dereitos e Servizos Sociais tíñalle manifestado á citada Asociación a súa vontade de mellorar a subvención anual que recibe a entidade, que este ano celebrará o seu 30 aniversario e que na actualidade conta con máis dun cento de persoas usuarias no seu centro de rehabilitación psicosocial, no Campo do Forno, e no centro ocupacional da Barcia.
A través do convenio suscrito, o Concello «colabora no programa de respiro familiar, ocio e benestar, que permite que as persoas con enfermidade mental e as súas familias disfruten de saídas nas fins de semana, para coñecer diferentes localidades de Galicia e de Portugal e para aumentar a súa integración social, recuperar habilidades para a vida cotiá, e combate o estigma que lle afecta ao colectivo», sinalaron dende Raxoi.