Minuto de silencio no Obradoiro polas últimas vítimas mortais de violencia machista

A compostelá praza do Obradoiro acolleu este mediodía un minuto de silencio polas dúas mulleres asasinadas o pasado 7 de xuño en Valencia e Barcelona, ambas vítimas de violencia de xénero.

Membros da Corporación e persoal do Concello participaron en dito acto, no cal se gardou o mencionado minuto de silencio en recordo ás mulleres. Volveu así darse cumprimento á moción aprobada por unanimidade no Pleno da Corporación o pasado 7 de setembro de 2015, que fixa accións de dó e solidariedade por cada asasinato machista.

«A violencia de xénero é a expresión máis extrema da desigualdade social que sofren as mulleres, e estes asasinatos prodúcense porque a violencia segue sendo utilizada como un mecanismo de control e dominación das mulleres. O Goberno municipal e o conxunto da Corporación condenan firmemente a violencia de xénero, e queren amosar a súa máxima solidariedade coas familias de todas as mulleres asasinadas», afirmou o Concello nun comunicado.