21 mayo, 2024
A Xunta de Goberno Local ven de aprobar a convocatoria de subvencións para o fomento de programas e actividades en prol da igualdade de xénero e do colectivo LGBTIQ+, así como para a prevención e loita contra as violencias machistas, para o curso 2024, a cal contará cun orzamento de 30.000 euros.
Así, estas subvencións cubrirán ata o 100% do orzamento presentado polas entidades solicitantes, cun máximo de 2.800 euros por entidade. As solicitudes poderán presentarse durante 15 días naturais a partir do día seguinte á publicación da convocatoria no BOP.
Por outra banda, o programa estrutúrase en torno a tres grandes liñas de subvencións:
A primeira liña estará centrada no apoio a programas e actividades que promovan a igualdade de xénero, tales como actividades de sensibilización e fomento da igualdade de oportunidades e de trato entre mulleres e homes; formación á poboación xuvenil en valores de igualdade de oportunidades para mulleres e homes; obradoiros en materia de igualdade, coeducación e prevención da violencia de xénero; actividades que fomenten a corresponsabilidade familiar e o cambio de condutas en materia de conciliación, e reparto de responsabilidades das tarefas doméstica e de coidado; accións relacionadas coa saúde da mulleres e o seu benestar xeral; formación en linguaxe non sexista, entre outras.
Unha segunda liña apoiará programas e actividades que promovan a igualdade de trato e os dereitos do colectivo LGTBQI+, como «actividades de sensibilización contra os estereotipos e prexuízos e de promoción da visibilidade e normalización dos dereitos das persoas LGTBQI; actividades de prevención da discriminación por razón de sexo, de orientación sexual ou identidade de xénero; actividades de información e sensibilización contra a LGTBIFOBIA; actividades dirixidas á prevención e loita contra o bullyng LGTBIFÓBICO; actividades que aborden o tratamento da diversidade sexual familiar e por razón de xénero, nos diferentes ámbitos sociais, ou calquera outra dirixida á consecución dos dereitos e liberdades do colectivo LGTBQI e da igualdade efectiva deste colectivo», sinala o Concello.
Por último, a terceira liña de subvencións centrarase para a prevención das violencias machistas no municipio de Santiago. O obxecto desta liña é o de apoiar a posta en marcha e/ou o desenvolvemento de actividades e iniciativas conducentes a avanzar cara a unha cidade libre de violencias machistas.
Ademais, no ámbito da Igualdade, o executivo local aprobou un convenio entre o Concello e Cáritas Diocesana de Santiago de Compostela por 30.000 euros para financiar o Programa Vagalume, que acompaña a mulleres en contextos de prostitución e ofrece atención integral para o seu empoderamento persoal, de saúde e socio-laboral.