Loita Armada presenta o videoclip «O Seu Puñal», un canto de protesta contra Altri

O próximo luns 24 de xuño, ás 19:00 h, o Centro Sociocultural O Ensanche será o escenario da presentación do videoclip «O Seu Puñal», composto pola banda Loita Amada, liderada polo estradense Pablo Carracedo, tamén coñecido como Jásper, ex-integrante do grupo Nao.

O videoclip foi rodado ao longo de toda a conca do Ulla, desde o seu nacemento na comarca da Ulloa ata a súa desembocadura na ría de Arousa e inclúe a participación de persoas cuxas vidas se verán directamente afectadas pola posible instalación da fábrica de celulosa que Altri pretende construír, así como escenas de diversas protestas sociais recentes. Este proxecto audiovisual pon de manifesto o perigo que supón esta instalación para toda a ribeira do río Ulla e as terras que baña, acompañando un tema musical composto especialmente para a ocasión.

O evento é organizado polo grupo Altri Non – Compostela, e nel intervirán Jásper, como cantante e representante do grupo, e Fins Eirexas, secretario técnico da Asociación pola Defensa Ecolóxica de Galiza (ADEGA). Nun formato de palestra e coloquio, discutirán sobre a afectación que a macrocelulosa tería no río Ulla e nas súas terras, así como a resposta social da poboación galega ante a ameaza ao tecido ambiental, laboral e social dun dos ríos máis emblemáticos de Galiza.

«A presentación pretende ser unha cita na que a cultura e a música se unan na defensa do medio ambiente galego, sensibilizando e mobilizando á sociedade sobre os riscos que a instalación da fábrica de celulosa de Altri supón para a rexión», sinalan dende a organización.