Golpe ás vivendas turísticas

As principais liñas da nova ordenanza complementaria sobre usos turísticos que o goberno municipal levará a Pleno nas vindeiras semanas para a súa aprobación foron presentadas en rolda de prensa pola alcaldesa de Santiago, Goretti Sanmartín, acompañada polo concelleiro de Urbanismo, Iago Lestegás.

Así, a rexedora explicou que esta ordenanza inclúe dous tipos de alugueiro turístico: o alugueiro turístico da vivenda por tempo limitado, cun máximo de 60 días ao ano, sempre que sexa tamén o lugar de residencia habitual dunha persoa física (entendido como lugar no que reside a persoa durante un período superior a 183 días ao ano), e o alugueiro turístico de determinados cuartos ou estancias na propia vivenda habitual. No caso do aluguer turístico por cuartos, aínda que está recollido na ordenanza municipal, tería que ser permitido expresamente na normativa de turismo de Galicia, xa que actualmente está prohibido polo Decreto 12/2017.

Nesta liña, a ordenanza detalla a documentación que deberá presentarse coa comunicación previa, incluíndo unha memoria técnica e unha certificación de que os usos turísticos da vivenda son compatibles cos estatutos da comunidade de veciños.

Por outra banda, Sanmartín aclarou que este texto só regula o procedemento de comunicación de usos asimilados ao de vivenda e que non entra a regular ou legalizar usos preexistentes aos establecidos no planeamento vixente. Neste sentido, explicou que os informes xurídicos conclúen que non é posible regularizar as actividades preexistentes á aprobación da modificación do PXOM, polo que, aínda que dixo que «entende o descontento da xente que actuou de boa fe», defendeu que está «a cumprir co programa electoral» do seu partido.

Pola súa parte, o edil de urbanismo detallou, segundo os datos urbanístico do Concello, que na actualidade hai 58 vivendas de uso turístico con título habilitante municipal, das cales 24 cumpren coa normativa vixente e 34 non cumpren coa modificación do PXOM, polo que o Concello non renovará as súas licenzas.

Ademais, falou das vivendas rexistradas no REAT (Rexistro de Actividades Turísticas da Xunta) no que, a datos do mes de abril, había rexistradas 816 vivendas, das que 170 poderían pedir o título habilitante porque cumpren coas normativa.

Tamén asegurou que desde o goberno municipal teñen «a intención de actuar» sobre todas as que non ten o título e que por iso «hai un «volume de traballo administrativo moi grande que dá os seus froitos lentamente, pero dáos».

Lestegás especificou que se emitiron 90 ordes de cesamento de actividade e hai 283 expedientes de comunicacións previas das que 33 cumpren co plan, 9 están pendentes dun informe de cumprimento de normativa técnica, 18 son legalizables se entregan documentación técnica, 6 son favorables pendentes de inspección, 109 pendentes de declaración de ineficacia, 52 xa teñen desistencia firme e o resto xa se iniciou o procedemento.

Tanto o concelleiro como a alcaldesa esperan que todas as vivendas que non teñan o título habilitante nin cumpran coa modificación do PXOM incorpórense ao mercado residencial e que se poida garantir «vivenda digna e adecuada».

¨Dispoñer dun parque de vivenda digna e adecuada é unha prioridade para este goberno», defendeu a alcaldesa, así como xa están traballando en diversas iniciativas para conseguir este obxectivo, as cales inclúen a creación dunha empresa pública para promover vivenda pública en alugueiro, a activación do rexistro de soares e a mobilización de vivenda baleira.

Iago Lestegás destacou que «o mercado turístico contrae o mercado residencial» e subliñou a importancia das medidas que están adoptando para favorecer un uso máis eficiente do parque residencial existente.

Sobre o alugueiro turístico das vivendas, o concelleiro de Urbanismo lembrou que «este uso non ten a consideración urbanística de uso residencial e que se trata dunha actividade económica e, polo tanto, como uso terciario está sometido ao réxime de comunicación previa á administración municipal».