3 mayo, 2024
Libros, contos, cadernos de campo e guías didácticas, pasando tamén por aplicacións móbiles e xogos. Máis de trescentos materiais de diversos formatos dan forma ao recén presentado GALIMAP, un mapa interactivo con materiais didácticos elaborados por persoas e institucións de Galicia para seren empregados como recursos educativos por profesionais da educación, especialmente da Educación Social, que se presentou esta semana na Facultade de Ciencias da Educación.
Este proxecto ‘GALIMAP: Mapa interactivo dos Materiais Didácticos Sociocomunitarios dos Concellos de Galicia. Unha proposta dende a Educación Social’ xurde con motivo da primeira convocatoria de Proxectos de Innovación Educativa dirixida ao profesorado da Facultade de Ciencias da Educación da USC e estivo encabezada polos docentes Jesús Rodríguez Rodríguez, Josefa del Carmen Fernández de la Iglesia, Silvia López Gómez e Ana Rodríguez Guimeráns.
A selección dos distintos materiais foi realizada por parte do estudantado da materia ‘Experiencias e Recursos en Educación Social’, mentres que os recursos para a difusión do mesmo son obra do alumnado de ‘Tecnoloxía Educativa’, ambos os dous do segundo curso do Grao en Educación Social da USC, quenes complementaron este GALIMAP cunha páxina web do proxecto que recolle videos e diferentes contidos en redes sociais e xogos dixitais.
O acto de presentación foi presidido pola vicedecana da Facultade de Ciencias da Educación, María López Sández, e contou tamén coa participación do profesorado das materias, das alumnas Raquel Blanco e Laura Manuela Cernadas, das profesoras da Universidade de Vigo Sara Martínez Carrera e María Cristina Sánchez Martínez e de Montse Sánchez en representación do Colexio de Educadoras e Educadores Sociais de Galicia.
Entre as persoas asistentes, ademais de alumnado acudiu profesorado do centro, gran parte do equipo decanal e representantes doutras institucións como Nova Escola Galega e o grupo Cavila.