Feminismos e humor confluirán en Santiago en ‘HumorSofías’

O primeiro Congreso Internacional sobre Feminismos e Humor ‘HumorSofías’ chegará a facultade Filoloxía os próximos días 7 e 8 de maio, nunha iniciativa impulsada polo Centro Interdisciplinario de Investigacións Feministas e de Estudos de Xénero (CIFEX) da USC e na que tamén participan a Universidade Complutense de Madrid e o Middlebury College, con financiamento da Deputación da Coruña.

A humorista, escritora e activista ecuatoguineana Asaari Bibang será , logo da inauguración polas autoridades, a encargada de abrir o encontro o día 7 nunha sesión matinal na que tamén terá lugar a mesa de comunicacións ‘De cómicas e comedias’ coa participación de expertas internacionais.

Nesa mesma tarde, a profesora da Universidade de Vigo Sabela Fraga impartirá a conferencia ‘O dobre movemento do humor nas artes’, seguida dunha nova mesa de comunicacións titulada ‘Resistencias humorísticas’. Rematará a xornada coa conversadeira Baia Fernández con ‘Ai que risa, Marisa!: Humor para cousas que non teñen graza’.

Por outra banda, no segundo día, a profesora do Trinity College de Dublín Catherine Barbour abrirá a xornada coa conferencia ‘Killjoys’ divertidas: Humor e vinganza no audiovisual galego feminista’, tras a que se desenvolverán novas mesas de comunicacións sobre o humor en imaxes e sobre risas dixitais, coa participación de numerosas especialistas en feminismos e humor de universidades galegas e do ámbito internacional.

O peche do encontro chegará cunha charla a modo de conclusión coas catro profesoras organizadoras do evento : as docentes da USC Yolanda Martínez Suárez e Marta Pérez Pereiro; Laura Lesta García, do Middlebury College; e Saleta de Salvador Agra, da Complutense de Madrid. Como broche final, as persoas participantes poderán asistir no Auditorio da Facultade de Ciencias da Comunicación á función teatral ‘Té con Kant’ a cargo de Inversa Teatro.

A inscrición neste encontro é gratuita ata agotar aforo.