27 abril, 2024
A alcaldesa compostelana Goretti Sanmartín informou en rolda de prensa acerca da resolución do procedemento de sanción a Urbaser, empresa adxudicataria do servizo de recollida de residuos e limpeza viaria do Concello de Santiago, debido a unha serie de incumprimentos no contrato.
Tal e como detallou Sanmartín, no mes de febreiro o Concello abriu o expediente para a imposición de penalizacións á empresa por varios incumprimentos das condicións recollidas no contrato asinado entre ambas partes o 21 de febreiro de 2022 e que entrou en vigor o 23 de maio do mesmo ano.
O informe previo á apertura do expediente revelou unhas serie de infracións no relativo a persoal, «como a presenza dun único administrativo, en lugar de dous; ou dun único técnico de produción ata o mes de xullo de 2023, en lugar de dous» e un «déficit de persoal equivalente a 500 xornadas de peóns no servizo dedicado ao varrido manual de xaneiro a decembro de 2023», destacou a rexedora.
Tamén foron identificados incumprimentos relativos á «obriga de reservar, como mínimo, o 50% das novas contratacións a mulleres» xa que se constatou que «de 30 persoas só 8 eran mulleres» ou a «falta de medios e maquinaria» concreatado no atraso na posta a disposición ou na carencia dalgúns dos vehículos do servizo.
«Eivas na infraestrutura informática e tecnolóxica», así como «deficiencias na prestación do servizo específico de recollida de voluminosos» ou o feito de que a empresa tampouco chegou a completar a substitución/reposición das 25 illas soterradas/ano comprometidas para o 22 de maio de 2023, provocando un «considerábel atraso acumulado no plan de traballo comprometido, xa que o 31 de decembro pasado unicamente se actuara sobre 23 delas», según Sanmartín, quedan recollidas no informe.
O expediente, por tanto, conclúe que a empresa é a responsable destas infraccións polo que o Concello imporá penalizacións que suman unha sanción total de 14.020 euros, ademais de serlle aplicado na facturación mensual «descontos directos por falta de medios humanos e materiais con respecto ás prestacións contratadas». En concreto «no ano 2023 deducíronselle 199.420 euros (sen IVE), que representan o 2,40% sobre o prezo de adxudicación, e no 2024 xa van 75.779 euros (0,91%), detallou a alcaldesa.