Dous novos doutores honoris causa de prestixio internacional ingresan no claustro da USC

A Universidade de Santiago de Compostela (USC) xa conta con dous novos doutores honoris causa máis entre o seu claustro. Trátase de Claire Chenu e Francesco Tonucci, destacadas figuras nos seus respectivos campos de coñecemento e cunha ampla carreira e traballos a prol da sustentabilidade e da mellora na educación de nenas e nenos.

Precisamente estes dous ámbitos son de interese para a universidade, tal e como sinalou o reitor, Antonio López, quen puxo de relevo o labor do profesor Tonucci no eido da pedagoxía e salientou as súas propostas para a mellora das escolas e para que “nenas e nenos poidan vivir unha experiencia autónoma de cidadanía”. Así mesmo, salientou o traballo da profesora Chenu “na conservación da biodiversidade dos ecosistemas agrícolas”, que é crucial para a seguridade alimentaria das persoas.

Abrindo o seu discurso en galego e empregando posteriormente tamén o francés e o castelán, Tonucci afirmou que o obxectivo do sistema educativo ha de ser axudar as nenas e os nenos “a desenvolver a súa personalidade ao máximo”, para o cal “é necesario escoitalos” e permitirlles “vivir libremente”. Nesta liña destacou a importancia de dedicarlle tempo ao xogo en liberdade e reducir o  emprego das pantallas menores idade, xa que favorecen o illamento do mundo real para refuxiarse nun virtual.

Francesco Tonucci é un destacado mestre e pedagogo italiano coñecido polo seu traballo en diferentes campos da educación e investigación. Desde 1966, cando comezou a traballar como investigador no Instituto de Psicoloxía do Consiglio Nazionale delle Ricerche en Roma, abordou temas como o desenvolvemento cognitivo, os métodos de ensino, a lectura e a escritura, entre outros. Baixo o pseudónimo de Frato, tamén creou cómics satíricos que acompañan a súa actividade investigadora.

Destacou especialmente no proxecto internacional «A cidade das nenas e dos nenos», que busca transformar as cidades para facelas máis axeitadas ao desenvolvemento sostible, tendo á infancia como punto de referencia. Este proxecto está presente en máis de 200 cidades de 15 países de Europa e América Latina. Tonucci recibiu varios recoñecementos ao longo da súa carreira, incluíndo títulos de profesor honoris causa e doutoramentos honoris causa de varias universidades en América Latina e España. Os seus libros son amplamente recoñecidos e considerados referencias importantes no ámbito da pedagoxía.

Pola súa banda, a doutora Chenu abriu o seu discurso lembrando que un 95% dos alimentos que consumimos proceden dos solos e que a metade das especies animais viven directamente sobre o mesmo, de aí a importancia que ten a súa conservación para o mantemento das condicións idóneas no ecosistema planetario.