Chega a Santiago a XIII edición do Encontro Artes pola Integración

Santiago e A Coruña comparten este ano a programación do XIII Encontro Artes pola Integración, que regresa á capital galega despois de varias edicións celebrándose exclusivamente na cidade herculina. O festival, que terá lugar entre o 19 de xuño e o 6 de xullo, emprega as artes escénicas como ferramenta de integración social e visibilización de proxectos e persoas con diferentes capacidades, moitas veces excluídas socialmente. O evento conta co apoio das concellarías de Capital Cultural e de Dereitos e Servizos Sociais.

A concelleira de Dereitos e Servizos Sociais, Promoción Económica e Xuventude, María Rozas, presentou a programación do XIII Encontro Artes pola Integración acompañada pola directora artística do festival, Carlota Pérez. Na rolda de prensa tamén participou a responsable de Cultura na Deputación da Coruña, Natividade González. Rozas mostrou a súa satisfacción «porque o festival volva estar centralizado en Santiago, aínda que compartindo sede coa Coruña, reforzando a vocación de Compostela como capital da cultura, da integración e do benestar social de Galicia». Loubou «non só a calidade artística do programa, senón tamén o traballo realizado con persoas con diferentes capacidades, demostrando que o talento artístico non entende de exclusións».

Artes pola Integración é un festival de transformación social a través das artes, iniciado en 2012 para visibilizar proxectos de comunidades afastadas ou persoas «con diversidades funcionais e talentos artísticos non comúns». O encontro desenvolverase en espazos escénicos, así como en rúas e espazos institucionais, acollendo proxectos artísticos locais, estatais e internacionais. Ademais, haberá xornadas de reflexión e debate, e diversas actividades formativas.

PROGRAMACIÓN

Así, este XIII Encontro Artes pola Integración comezará o mércores, 19 de xuño, no Auditorio de Galicia, coa presentación da obra «Cerebrartes», un proxecto financiado pola Concellaría de Dereitos e Servizos Sociais, no que Carlota Pérez traballa desde comezos de ano cun grupo de 20 mozos e mozas, explorando a danza e o teatro desde a neurociencia. A montaxe completa, coa participación da Banda Municipal de Música, presentarase en outubro. A continuación, a compañía catalá Promena ofrecerá outra proposta. O 22 de xuño, o hall do CGAC acollerá a peza «Tuétano» da compañía Experimentadanza.

O 6 de xullo, o festival chegará ao centro sociocultural Maruxa e Coralia cunha mostra de videodanzas en colaboración co Fiver Dance Film Festival e a proxección do documental «Tres mujeres», de Alexis Delgado. A xornada inclúe unha mesa de debate titulada «Territorios que crean», na que se presentarán proxectos como a Rede Aldear, Museum&Me e a escola Waldorf Meniñeiros de Friol. Participarán a arteterapeuta Rebeca Ponte, a xerente da rede museística de Lugo Encarna Lago, o psicólogo Vicente Galaso, a bailarina e coreógrafa Nuria Sotelo, así como Carlota Pérez e Jordi Cortés da asociación Diversos.

Na tarde do 6 de xullo, está previsto un concurso de pezas para a comunidade no parque de Bonaval, presentado por Adriana Paulos. Poderán participar grupos de entre unha e cinco persoas, incluíndo algún membro con discapacidade física ou psíquica. Haberá dous premios de 500 euros cada un.

Por último, do 15 ao 30 de xuño, no CSC Maruxa e Coralia estará dispoñible a exposición «A pequena Bauhaus», un proxecto de deseño e artesanía realizado por nenos e nenas de 9 a 14 anos, con obradoiros impartidos por recoñecidos artistas.

Malia o regreso a Santiago, o XIII Encontro Artes pola Integración mantén tamén a súa sede na Coruña. O 21 de xuño haberá dúas propostas no Auditorio Forum e no teatro Rosalía de Castro; e o 7 de xullo, unha nova sesión do concurso de pezas para a comunidade nos xardíns de Méndez Núñez.