15 mayo, 2024
O Simposio Internacional sobre o Doutoramento en Educación ‘Coñecemento e Acción Transformadora’ chega á capital compostelá hoxe día 15 e ata mañá día 16 de maio, unha cita celebrada en conmemoración dos dos 50 anos dos estudos de Pedagoxía na Universidade de Santiago de Compostela e organizada por a Facultade de Ciencias da Educación, xunto co Departamento de Pedagoxía e Didáctica e o Instituto de Ciencias da Educación (ICE).
Así, a sesión inaugural botará andar ás 9.30 horas presidida polo reitor Antonio López e contando coas intervencións de José Alberto Díez de Castro, secretario xeral de Universidades da Xunta de Galicia; Mar Lorenzo Moledo, decana da Facultade de Ciencias da Educación da USC; Carmen Fernández Morante, directora do Instituto de Ciencias da Educación da USC; Pablo Taboada Antelo, director da Escola de Doutoramento Internacional da institución compostelá (EDIUS) e Miguel A. Santos Rego, presidente do Comité Organizador do Simposio.
«Supón unha magnífica oportunidade de reflexión e punto de encontro entre investigadoras e investigadores do ámbito da Educación. Entre outros obxectivos, pretendemos analizar a situación e perspectivas do Doutoramento en Educación no marco dunha Sociedade do Coñecemento. Ademais, trátase de dialogar sobre a relevancia e calidade dos Programas de Doutoramento, estudar as súas distintas modalidades, e xerar e/ou afianzar espazos de debate e participación das/os estudantes de doutoramento en Educación», sinalan dende o comité organizador.