Arranca en Santiago o Simposio Internacional literario ‘O que virá’

A Facultade de Filoloxía acollerá entre os días 29 e 31 de maio o Simposio Internacional ‘O que virá’, no que se exporán diversas perspectivas críticas e teóricas acerca da literatura contemporánea, cun especial foco e interese pola latinoamericana. Este encontro, que tamén rende homenaxe á ensaísta e profesora arxentina Josefina Ludmer, incluirá contribucións que enriquecerán o debate sobre cuestións formais, tipolóxicas, editoriais, ecolóxicas, estéticas e culturais nos diferentes sistemas literarios actuais.

Así, a conferencia inaugural terá lugar este mércores ás 10:00 horas no salón de actos da facultade, baixo o título ‘La literatura postautónoma en sociedades extremadamente violentas’, impartida por José A. Sánchez Carbó, profesor da Universidade Iberoamericana-Puebla.

Terán cabida tamén diferentes sesións de presentación de investigacións a cargo do persoal investigador da USC, mentres que nestas tres xornadas abordaranse temas como o posmonolingüismo e as literaturas posautónomas; violencia e denuncia na poesía mexicana actual; o baleiro como espazo poético; o teatro de Lola Arias; biografía e bioficción como encontro entre literatura, historia e crítica; tradición e evolución da vía ascética na poesía; instancias de lexitimación e mediación nos procesos de circulación literaria transnacional; e xustiza climática e racismo ambiental en narracións máxico-realistas brasileiras.

O 31 de maio, na xornada de clausura, a xornada incluirá unha mesa redonda na que Antonio J. Gil González, da USC, e Carmen Morán Rodríguez, da Universidade de Valladolid, reflexionarán sobre ‘O infinito: literatura mutante ou zombi?’. O simposio concluirá coa conferencia de clausura de Ana Gallego Cuiñas, da Universidade de Granada, titulada ‘Figuras de escribots: autoría e intelixencia artificial’.

O simposio está dirixido por Paulo Gatica Cote e Sarah Vidal Horta, e coordinado por María Díaz Fernández e David Lea. Conta co apoio do Grupo de Investigación Teoría da Literatura e Literatura Comparada da USC, o proxecto de investigación ‘Estéticas da obsolescencia: elementos para a análise das relacións entre literatura e novos medios’, a Cátedra de Cultura Latinoamericana Alejo Carpentier, o Departamento de Lingua e Literatura Españolas, Teoría da Literatura e Lingüística Xeral da USC, e a Vicerreitoría de Estudantes e Cultura.