24 junio, 2024
A Xunta de Goberno aprobou hoxe o proxecto básico e de execución das obras de acondicionamento do futuro Centro Sociocultural e de Maiores do Ensanche, que estará situado na antiga sede da Seguridade Social en San Pedro de Mezonzo, cunha actuación que ten un orzamento de algo máis dun millón de euros e estímase un prazo de execución de 10 meses.
Este novo Centro Sociocultural e de Maiores estará ubicado na planta baixa do número 17 da rúa de San Pedro de Mezonzo, no local cedido ao Concello pola Tesourería Xeral da Seguridade Social por un prazo de 25 anos. As dependencias teñen unha superficie total de 1.200 metros cadrados, e o proxecto contempla a demolición das divisións e acabados actuais para adaptalos ao novo servizo, así como a renovación das fachadas, tanto á rúa como ao patio interior. As obras teñen un orzamento previsto de 1.149.518,59 euros, IVE incluído.
Así, o novo servizo, que estará xestionado polas concellarías de Dereitos e Servizos Sociais e Centros Socioculturais, permitirá fomentar as actividades interxeracionais e o envellecemento activo da poboación maior de Compostela. Para iso, o centro contará con cinco espazos para obradoiros, unha ampla biblioteca vinculada a unha sala de lectura e un salón de usos múltiples con capacidade para preto de 180 persoas. Ademais, disporá de despachos, unha praza e un patio interiores.
Nesta liña, o Centro Sociocultural e de Maiores permitirá mellorar a oferta de actividades no Ensanche, xa que o actual centro sociocultural de Frei Rosendo Salvado ten limitacións de espazo para acoller determinadas propostas que si terán cabida nas novas instalacións. Ademais, será un servizo innovador para as máis de 23.000 persoas maiores de 65 anos que viven en Santiago, 4.800 delas no Ensanche.