Amplo programa de actividades para a Festa do Banquete de Conxo

O Pazo de Raxoi acolleu a presentación do programa completo de actividades da quinta edición da Festa do Banquete do Conxo, A cal correu a cargo da alcaldesa de Santiago, Goretti Sanmartín, e a tenenta de alcaldesa, María Rozas.

Así, a xornada principal da V Festa do Banquete de Conxo será o propio domingo 26 de maio. Esta iniciará co desfile «Alá van estudantes e artesáns», organizado artisticamente polos Quinquilláns, partindo da praza do Toural e percorrendo as rúas de Compostela ata chegar á praza de Conxo. Seguirá cunha representación teatral do Banquete de Conxo na carballeira, dando paso ao tradicional «Serán da Fraternidade», con xantar e romaría popular, onde veciños e veciñas compartirán brindes.

«A festa será unha celebración da fraternidade, da liberdade e da igualdade; valores que simbolizan aquel acto histórico do Banquete de Conxo, reunindo estudantes e artesáns no século XIX na antiga Carballeira de Conxo», indicou a alcaldesa, animando a toda a veciñanza a unirse ao desfile e a compartir comida nesta romaría. Destacou tamén a implicación da parroquia de Marrozos nas Festas, coa lectura do pregón inaugural por parte de María Luísa Otero e a participación da Asociación Pena Maior nun obradoiro de baile tradicional e nos percorridos do Tren do Banquete. Nesta liña, tanto Sanmartín como Rozas agradeceron as achegas de todas as asociacións veciñais e culturais implicadas na organización das Festas e o traballo levado a cabo polos diferentes departamentos municipais nesta aposta do Concello pola transversalidade.

UN PROGRAMA CARGADO DE PROPOSTAS

A propia rexedora compostelá compartiu algunhas das actividades do programa. O venres 24 de maio, a partir das 17:30 horas, terá lugar ‘As Voces do Bosque’, un percorrido literario pola histórica carballeira de Conxo guiado polo editor e escritor Quique Alvarellos. Durante o percorrido, lembrarase as autoras e autores que escribiron sobre o bosque ou no bosque, desde o século XII ata o XX. O punto de saída será diante da Igrexa de Conxo e, para participar, é necesario inscribirse en rutabanquete@santiagodecompostela.gal.

A partir das 18:30 horas, a praza de Conxo acollerá un obradoiro de baile tradicional impartido pola Asociación Cultural Pena Maior de Marrozos. Dirixido a todas aquelas persoas interesadas en adquirir competencias básicas no achegamento á danza tradicional galega, este obradoiro estará acompañado de música en directo por parte de pandereteiras. Durante a sesión, aprenderanse puntos para a danza de ritmos tan populares como a jota ou a muiñeira. Trátase dunha actividade aberta ao público en xeral, sen necesidade de inscrición previa.

O sábado 25 de maio, ás 11:00 horas, terá lugar a Carreira de Orientación da Festa do Banquete, unha proba non competitiva con opcións e categorías para todas as idades e niveis. Ofrece a posibilidade de realizar a proba de xeito individual ou grupal, fomentando así a participación de familias. A carreira transcorrerá polos terreos do propio bosque do Banquete. Esta actividade é de balde, previa inscrición a través de xestanatureza.com.

En canto o día grande destas festividades, o domingo 26 de maio, a partir das 11:00 horas, arrancará desde a praza do Toural o desfile teatral «Alá Van Estudantes e Artesás». Dirixido por Os Quinquilláns e con participación das Brigadas Teatrais de Catoira, As Superactivas do CSC de Santa Marta, Teatro do Muíño (Laraño), Teatro do Solpor (Vite), Clube Mozo e veciñanza activa do CSC Aurelio Aguirre de Conxo, Teatro Mediogüevo, Asociación Aspas, Mercedes Espiño, Música de Rúa Os Farrapos, Coro A Oliveira, Grupo de Teatro da Casa da Muller do Couto, e acompañamento musical por Luís «O Caruncho».

Ás 12:45 horas, terá lugar o pregón da Festa do Banquete a cargo de María Luísa López Otero, autora da tese «Santa María de Marrozos no Século XVI: Labradores e Arrendatarios», na praza de Conxo. Ao rematar, sobre as 13:00 horas, continuará o desfile teatral «Baixamos ao Bosque do Banquete» ata a Carballeira de Conxo para facer a recreación teatral do Banquete de 1856 desde as 14:15 horas. A alcaldesa tamén animou a todas as persoas participantes a facer uso do Fotocol, situado no Mosaico de Conxo entre as 14 e as 19 horas.

A partir das 15:00 horas, dará comezo o xantar e a romaría popular, con brindes de veciñas e veciños na propia carballeira de Conxo, para dar paso ao Serán da Fraternidade, con foliada de música tradicional con Os Fondaos do Pífaro, Devagarinho de Villestro, Asociación de Música e Baile Tradicional de Conxo, Grupo de Cantos de Taberna Contedores de Recandea, Muiñeiros do Sarela, e Asociación Penamaior de Marrozos. A compañía Paporrubio tamén ofrecerá o espectáculo «Transhumancia Sonora» que levará ao bosque do Banquete os seus animais cabezudos, acompañados de música e xogos.

Para rematar o evento, arredor das 19:30 horas, haberá unha despedida da Festa do Banquete 2024 con discursos de Os Quinquilláns e pregón de peche a cargo da cineasta Jaione Camborda.

Por outra banda, tamén chegará con esta cita a quinta edición do popular mercado do libro, que terá lugar o sábado 25 e o domingo 26 na praza Aurelio Aguirre. «Este ano contaremos con 16 postos, cinco máis que o ano pasado, consolidando así esta cita no calendario de libreiros, editoriais e mesmo ilustradoras vinculadas ao libro», explicou María Rozas, así como que este mercado complementarase cunha pequena mostra de oficios tradicionais, con postos de forxa, cerámica e cestería.

A tenenta de alcaldesa tamén presentou varias actividades que se levarán a cabo de xeito paralelo ao mercado na tarde do sábado 25: unha mesa redonda sobre «Libros, Mente e Saúde» no claustro do Hospital Psiquiátrico, conducido pola psicóloga clínica Rosa Cerqueiro, coa participación de Xurxo Alonso, Antía Yáñez e Montse Fajardo. A partir das 18:30 horas, haberá a actuación da compañía N+1 de circo, teatro e danza para o público infantil na praza central de Conxo. Xa a partir das 21 horas, a Festa da Poesía na praza Aurelio Aguirre, conducida por Lorena Conde e coa participación musical de Filloas, Ash Diz e C Mirazo. A poesía estará a cargo de Sara Porto Puente, Diana Kurich, Branca Trigo e Marta Dacosta.

O domingo 26, celebrarase unha gran chocolatada na praza Aurelia Aguirre e un concerto do Sonoro Maxín que servirá de peche deste Mercado do Libro.

No plano musical, o venres 24 de maio destaca a actuación dos Cantos de Taberna en colaboración cos Muiñeiros do Sarela, seguido dun percorrido polos bares do barrio. O sábado 25, na praza Aurelio Aguirre, haberá unha sesión vermú e un evento de «Canto Fraterno» coa participación de varios coros. Tamén se presentan actividades relacionadas co medio ambiente, como un xogo na natureza e un taller de observación de aves. Ademais, anúnciase o primeiro certame fotográfico do Banquete de Conxo, con premios para as mellores fotos vinculadas á celebración.

Para todos os interesados, o programa pode consultarse íntegramente nesta dirección