21 mayo, 2024
A alcaldesa Goretti Sanmartín e representantes dos grupos municipais participaron no acto de clausura do Correlingua 2024, celebrado en Santiago de Compostela, no que contaron con 1.060 rapaces e rapazas de 10 centros de ensino.
Na súa intervención, a rexedora compostelá renovou o compromiso co idioma galego, subliñando a súa importancia en Santiago, unha cidade internacionalmente coñecida onde a lingua galega ten unha presenza destacada. Enfatizou a responsabilidade de falar en galego e propuxo á organización do Correlingua un «contrato de fidelidade á lingua galega» para quen desexe asinalo, agradecendo a celebración do evento en Compostela, «un concello orgulloso de falar a lingua propia e de garantir os dereitos lingüísticos das persoas galegofalantes».
O contrato compromete aos asinantes a actuar como axentes normalizadores da lingua galega no colexio ou instituto, e fóra del, usando activamente e con responsabilidade o galego na vida escolar e destaca que a mellor forma de conseguir a normalidade para a nosa lingua é coa práctica diaria, comprometéndose a participar na construción dun presente digno e dun futuro esperanzador para o idioma galego, e sumándose aos miles de mozos e mozas que están a cambiar a historia de Galicia mantendo a fidelidade á lingua, principal sinal de identidade.
O documento tamén insta a «mellorar as actitudes cara ao noso idioma e aumentar os usos formais e informais no contexto escolar», ademais de «demostrar que falar e escribir en galego é doado, útil e valioso».
Por outra banda, no acto tamén participaron o presidente da Mesa pola Normalización Lingüística, Marcos Maceira; o secretario comarcal de CIG-Ensino, Rubén Monteagudo; e a responsable de Correlingua, María Buño. O evento contou coa presenza de Isabel Risco, a actuación de Cuarta Xusta, e a participación de alumnado e profesorado dos centros de ensino Xelmírez I e II, Rosalía de Castro, Eduardo Pondal, Xulián Magariños, Terra de Soneira, Dices, Monte dos Postes, Apóstolo Santiago e Vite.