A Semana da Prevención de Incendios recibirá a visita duns 800 escolares

Máis de 800 escolares de Santiago participarán hoxe e mañá nas actividades da Semana de Prevención de Incendios, organizadas polo Servizo Municipal de Extinción, a Fundación MAPFRE e a Asociación Profesional de Técnicos de Bombeiros. O obxectivo do programa é sensibilizar á veciñanza e ensinar como reaccionar ante situacións de emerxencia.

O concelleiro de Mobilidade, Convivencia e Centros Socioculturais, Xan Duro; o xefe do Servizo Municipal de Extinción de Incendios, Manuel Sanmartín; o presidente da delegación galega da Asociación Profesional de Técnicos de Bombeiros, Juan Jesús Mariño; e o representante da Fundación MAPFRE, Miguel Ángel Talabante, visitaron esta mañá as actividades, nas que tamén colaboran as Policías Local e Nacional, Protección Civil, e o 061.

Duro explicou que o obxectivo do programa é «sensibilizar á cidadanía e axudarlle a identificar os riscos que se poden presentar nos lugares que frecuentamos, como os nosos fogares, lugares de traballo ou colexios, e proporcionarlles os coñecementos necesarios para actuar diante dunha emerxencia». Por outra banda, Manuel Sanmartín destacou que «esta actividade aproveita o interese que os bombeiros sempre espertan entre os nenos e nenas, para conciencialos e, a través deles, chegar ás familias e fomentar a adopción de medidas de prevención». Neste sentido, Sanmartín indicou que tamén se mostran «pautas de comportamento ante situacións de emerxencia».

PROGRAMA

«O eixo principal da Semana da Prevención de Incendios é «A Casa de Fume», unha vivenda inchable na que as persoas participantes poden aprender as claves para «escapar» dun lugar no que se orixinou un incendio. Ademais, mostrarase como manexar as mangueiras e extintores, haberá exhibicións de vehículos de bombeiros ou traxes de intervención; e tamén talleres prácticos de reanimación cardiopulmonar e primeiros auxilios a cargo do 062 ou talleres demostrativos dos equipos de respiración e material de escape. Outro dos atractivos do programa serán as exhibicións de rescate vertical en altura», destacou o Concello.

Desde a súa creación, a Semana de Prevención de Incendios de Fundación MAPFRE e APTB chegou a milleiros de escolares en toda España cun programa didáctico que inclúe simuladores, vídeos educativos e obras de teatro. Segundo o Estudo de Vítimas de Incendios en 2021, elaborado por Fundación MAPFRE e APTB, a maioría dos falecementos por incendios en fogares ocorren en salóns ou dormitorios, a miúdo pola noite. En 2021, houbo 152 mortes en incendios domésticos, das cales o 70% foron por intoxicación por gases e fume. A APTB subliña que os detectores de fume poderían evitar moitas destas mortes, xa que a maioría das vítimas non se despertan ao comezo do incendio.