A delegación compostelá nos XV Xogos do Eixo Atlántico: 49 deportistas en 6 modalidades distintas

Centos de mozos e mozas de Galicia e do Norte de Portugal competirán durante unha semana en Vila Nova de Famalicão e en Braga na XV edición dos Xogos do Eixo Atlántico, que comezan o vindeiro domingo 30 de xuño.

Precisamente Santiago de Compostela achegará 49 participantes en 6 modalidades deportivas: baloncesto feminino, baloncesto masculino, fútbol 7 feminino (novidade nesta edición), atletismo adaptado masculino e atletismo adaptado feminino. A delegación compostelá buscará así repetir os éxitos da edición de 2022, cando foi a que máis ouros acadou nas modalidades colectivas, posicionándose no primeiro lugar en baloncesto masculino, feminino e fútbol 7.

As modalidades deportivas desta XV edición dos Xogos do Eixo Atlántico inclúen balonmán feminino e masculino, voleibol feminino, baloncesto masculino e feminino, natación e natación adaptada, e atletismo e atletismo adaptado. Como novidade desta edición, ao fútbol 7 masculino engádese tamén o fútbol 7 feminino.

Como vén sendo habitual, esta edición tamén integrará modalidades de deporte adaptado, coa participación de case 200 persoas, en liña coa filosofía do Eixo Atlántico de eliminar barreiras e fomentar a participación deportiva de toda a cidadanía.

O próximo 26 de xuño celebrarase unha rolda de prensa en Braga na que se coñecerán máis detalles do evento.