22 agosto, 2024
Se algunha persoa do noso Concello vira a esa nena subida á estatua do eremita Paio, chamaríalle a atención, por non respectar a realidade. Ao mesmo tempo, as persoas que estabamos a certa distancia da nena, non queriamos dicirlle ren, por medo a que caera, co conseguinte problema para o noso Concello, polo perigo que unha estatua dese xeito, sen protección polos lados, entraña. En calquera caso o maior problema da estatua de Paio non é ese.
O que lle ven á mente a calquera persoa que teña idea da historia dun pobo -e ¡vaia historia que ten Santiago!-, é que non se poden dar pasos sobre acontecementos históricos sen ter idea da historia, ou o que é peor, desfigurando adrede a historia.
A inscrición que lle puxeron a ese busto é deformadora da historia, pois quédase con aspectos que Paio, o home que intuíu que os restos do Apóstolo estaban por ese entorno, non transmite a verdade digna de se manter para quen queira contemplar a historia real. Ven dicir que o eremita Paio non interpretou adecuadamente o senso de aquelas lumieiras, ou ben prefire non recoller o que o eremita viviu e transmitiu. Polo tanto, o chamarlle ao eremita Paio “Paio de Solovio”, adobado o título coa expresión “ollador de estrelas”, non so non responde á realidade (deixando a dúbida de se é un astrónomo ou un “pasmón”), se non que procede da ignorancia ou ben do positivo intento de reformar aquela realidade histórica dunha persoa relixiosa por todas as costas. Quizais isto lles vaia mellor, por non encaixar o eremita “testemuño da luz” coa falta de sensibilidade relixiosa de quen promove o busto en cuestión ou por quen require que a inscrición sexa dese tipo e non de outro.
Nestes tempos lévase dito de moitos xeitos que os que ostentan o poder político queren reformar a historia como a eles lles vaia ben. Co seu proceder, perturban a historia, que tería que reflectir o que naquel tempo era realidade. É unha pena que esa estreiteza de visión desfigure o que en realidade aconteceu.
Non basta o interese por defender a nosa autonomía, para ter cargos de importancia nela. Cadaquén debería ter coñecementos e actitudes elevadas, sobre todo para moverse nos ámbitos de poder. Mesmo, con todos os respectos para o noso campo, non se pode dirixir unha cidade, que é capital de Galicia, con criterios de aldea.