28 junio, 2024
A XVII edición do Encontro coa Arte de Brión, dedicada este ano a Luísa Villalta, comezou esta mañá con obradoiros de pintura de acuarela e modelado abertos á veciñanza brionesa. Estes talleres, impartidos polos artistas José A. Regidor, Frutos Casado de Lucas, José Galarzo e María Carmen Martínez, contaron coa participación de nenos e adultos, e tiveron lugar xunto á Casa da Cultura.
Con esta actividade arrincan tres días de convivencia e intercambio artístico que este ano reúnen a 26 artistas plásticos. Esta tarde terá lugar a primeira das tres sesións de “Pintura do natural” no adro da Igrexa dos Ánxeles, onde os artistas tamén participarán na xornada “Brión: unha historia que contar. O Camiño de peregrinación a Santiago”, na propia igrexa. Este faladoiro, dirixido polo xornalista José Manuel García, contará coa participación de Sebastián Valverde, xerente da Asociación de Concellos do Camiño da Ría de Muros Noia; Cándido Pazos, escultor; Manuel F. Rodríguez, escritor; e Daniel Pernas, de Multicentros Pernas en Pontevea.
Ao finalizar a xornada, os artistas desprazaranse á sala municipal de exposicións de Brión para a inauguración da mostra do XVI Encontro coa Arte: Lembrando a Francisco Fernández del Riego, presidida pola concelleira de Cultura, Sandy Cebral. Neste acto entregaranse os premios do Concurso de Pintura e Debuxo, que terá lugar esta tarde no adro da Igrexa dos Ánxeles.
Por outra banda, a gran novidade da edición deste 2024 será mañá sábado 29 de xuño, cando os artistas viaxarán á vila de Muxía para realizar dúas sesións de pintura do natural (de 10:00 a 14:00 horas e de 16:30 a 19:30 horas). Aínda que o Encontro coa Arte de Brión xa saíu do municipio noutras ocasións, esta será a primeira vez que se despraza máis aló das comarcas de Santiago e Barbanza, regresando a expedición a Brión ás 21:30 horas para asistir ao concerto “Luísa Villalta: vivir a súa poesía a través da música”, do conxunto Entrelas Grupo Vocal, un acto gratuíto e aberto á veciñanza.
Finalmente, o domingo 30 de xuño, de 10:00 a 14:30 horas, terá lugar unha última sesión de pintura do natural no paseo do río Pego (Brión). Durante os tres días estará aberto un mercado da arte na sala municipal de exposicións, onde os veciños e veciñas de Brión poderán mercar obras orixinais dos artistas participantes no Encontro.
En canto aos artistas participantes nesta edición, aparecen: Alba Roqueta, Ángel Contreras, Antón Sobral, Carmen Martín, Chelo Rodríguez, Frutos Casado de Lucas, Isabel Pintado, Iván Prieto, Joaquín Cortés, José A. Regidor, José Galarzo, Laureano Vidal, Manuel Alpañes, María Carmen Martínez, María Manuela, María Xesús Díaz, Mariano Casas, Miguel Anxo Varela, Paco Casal, Rafa Arroyo, Ricardo Rilo, Siro, Tino Canicoba, Veiras Manteiga, Xosé Vázquez Castro e Xosé Vizoso.