O Instituto da Lingua Galega constitúe o seu Foro Social

O Instituto da Lingua Galega (ILG) da USC vén de constituír o seu Foro Social, un órgano de asesoramento externo composto por 12 membros de diversas entidades públicas e privadas dos ámbitos educativo, cultural, editorial, medios de comunicación, investigación e empresarial, entre outros, e que ten como principal obxectivo debater as tendencias e cambios nas demandas sociais que poidan influír nas actividades de investigación, difusión e transferencia do Instituto. Ademais, prestará apoio na elaboración e implantación dos plans estratéxicos do centro e axudará a aumentar a súa proxección na sociedade.

Neste senso, a reunión constitutiva deste martes, a directora do ILG, Elisa Fernández Rei, proporcionou información aos membros do Foro sobre a axenda científica do Instituto, as accións emprendidas para promocionar a súa investigación e aumentar a súa visibilidade social, así como as actividades destacadas para contribuír ao avance científico e tecnolóxico.

Asi, este foro quedou constituído formalmente nunha xuntanza na que participaron a secretaria do ILG, María Álvarez de la Granja; o secretario da Asociación de Actores e Actrices de Galicia, Xosé Barato; a secretaria do Centro de Innovación Educativa e Dixital-CIEDIX, Lorena Barbeito Barciela; o director do Centro Singular de Investigación en Tecnoloxías Intelixentes-CiTIUS, Senén Barro Ameneiro; a presidenta da Coordinadora de Traballadores/as de Normalización da Lingua-CTNL, Mónica Fernández Valencia; a profesora de Lingua Galega e Literatura no IES do Milladoiro, Valentina Formoso Gosende; o científico do Instituto de Ciencias do Patrimonio-Incipit do CSIC, César González Pérez; a vicepresidenta da Asociación Galega de Editoras, Ana María Guerra Cañizo; o membro do Colexio Profesional de Xornalistas de Galicia-CPXG Ramón Paz González; a responsable da oficina de I+D+i de Balidea, María del Carmen López Pérez; o responsable da área de Terminoloxía do Servizo de Normalización Lingüística da USC, Xusto Rodríguez Río; a alcaldesa do Concello de Santiago de Compostela, Goretti Sanmartín Rei, e a creadora de contidos para redes sociais Sara Seco Rial.