14 junio, 2024
Resaca Emocional é o nome do novo colectivo creativo galego que hoxe se presenta ao mundo co lanzamento do seu primeiro sinxelo, «Bolboretas», dispoñible nas principais plataformas dixitais.
Este colectivo, coñecido tamén como RSK, está formado por artistas da música e das artes visuais, así como por un amplo equipo técnico. A comunidade é a clave deste proxecto, que se caracteriza pola súa diversidade e pola inclusión de todas as persoas.
«Resaca Emocional é un espazo seguro, onde todos suman. Apostamos pola creatividade e o traballo común desde a diversidade, sen importar a idade, identidade de xénero, orientación sexual ou condicionamentos mentais, sociais ou de saúde», expresa o colectivo.
Este opta por un son pop, naïf e sensíbel, con toques de baile e desfase techno. As emocións son o eixo central do imaxinario do colectivo, como se pode escoitar no seu primeiro traballo, editado por Tremendo Audiovisual, onde exploran sentimentos como o amor, a amizade e a paixón en todas as súas formas.
O primeiro adianto deste traballo é «Bolboretas», o sinxelo debut de Resaca Emocional. Esta canción é descrita como «unha viaxe pop que equilibra a tensión entre o desexo contido e a catarse, pintando unha imaxe vívida da delicada danza entre a atracción e o medo». A través de sintetizadores e percusións envolventes, e cunha animación coidada creada por Peque Varela, a canción aborda a idea de que «todos somos museos vivos, formados por pedazos que tomamos da xente que queremos, dando forma así ao que somos», explica o colectivo.
«Bolboretas» marca o inicio dunha prometedora traxectoria para Resaca Emocional, un colectivo que aposta pola innovación, a inclusión e a exploración emocional a través da súa música e arte.