14 junio, 2024
O Foro Galego de Inmigración convoca a xornada «Falemos do coidado dos nosos corpos», que terá lugar este sábado día 15 de xuño ás 10:00h no Centro Socio-Cultural Maruxa e Coralia de Santiago de Compostela, na Praza Salvador Parga nº 4.
Esta actividade enmarcase no contexto do «Convenio 189 da OIT sobre traballo decente das traballadoras do fogar e coidados: situación despois de dous anos da súa ratificación polo Estado español».
Hai case dous anos, o 9 de xuño de 2022, tivo lugar a ratificación por parte do Estado español deste convenio, e case tres meses dende a súa entrada en vigor o pasado 29 de febreiro. O obxectivo desta xornada é, polo tanto, facer balance dos avances conseguidos e dos retos pendentes na plena trasposición do Convenio 189.
«Co obxectivo de facer balance do que se ten avanzado, e do que aínda queda por percorrer no proceso de plena trasposición do Convenio 189, dende o Foro Galego de Inmigracion, xunto coas entidades que traballan pola Dignificación do (THYC) Movilidade Humana, Sedoac, Xiara e aliadas como o ESOMI da UDC , temos o gusto de convidar as persoas interesadas e implicadas a participar nunha xornada de celebración, balance e prospectiva sobre a dignificación e garantía de dereitos das traballadoras do fogar e coidados e a realidade destas persoas, na súa maioría mulleres e migrantes que realizan este traballo», declarou a organización a través dun comunicado.
Este espazo é aberto ao público e contará coa participación de asociacións, traballadoras do fogar e coidados, así como organizacións sindicais, de defensa dos dereitos laborais e investigadoras da Universidade. O programa desta xornada, con Soledad Lúcero como moderadora, inclúe:
10:00 h: Rexistro e Acollida
10:10 h: Plataforma de dixitalización. Raquel Mártinez Buján.
10:50 h: Empregadas do Fogar e incidencia política. Carolina Elías.
11:40 h: Situación e proceso das empregadas de fogar en Galicia. Teresa Rodríguez Vilaseco.
12:30 h: Que é o emprego de fogar nos nosos corpos?. Karla Girón.
13:30 h: Espazo de debate e conclusións