O Concello de Camariñas e o club ciclista PC Baikers do Vilán están a organizar unha ruta ciclista entre Camariñas e Peniche, co obxectivo de reforzar o irmandamento que une ambas vilas desde 2011. A iniciativa, que terá lugar entre o 26 e o 29 de agosto, contará coa participación de 14 ciclistas que percorrerán un total de 586 quilómetros en catro etapas, facendo paradas con recibimento oficial en Vigo, Porto, Figueira da Foz, Serra d’El-Rei e, finalmente, en Peniche.
O concelleiro de Deportes, Fabián Canosa, que tamén se unirá á ruta, destacou que «o obxectivo é ampliar as relacións entre as dúas localidades irmandadas e aproveitar a ocasión para facer promoción do encaixe de Camariñas, das súas tradicións e do potencial da Costa da Morte». Canosa salientou que, ademais do encaixe, existen moitos outros elementos que unen Camariñas e Peniche, como o turismo, a pesca, a industria e o deporte.
O irmandamento entre Peniche e Camariñas ten como principal nexo en común o encaixe, unha tradición artesá de gran importancia en ambas vilas. Esta ruta ciclista non só busca reforzar os lazos existentes, senón tamén impulsar e visibilizar esta forte tradición. Durante o percorrido, entre etapa e etapa, os ciclistas aproveitarán para promover o «Encaixe de Camariñas», así como as tradicións e as potencialidades da Costa da Morte.
Destaca tamén nesta ruta o papel de Salgado Frozen Seafood, de gran relevancia como demostra a súa aportación ao mundo do ciclismo e a implicación neste proxecto en particular a través do seu equipo Salgado Team Bike.
ETAPAS
As etapas previstas para a ruta son as seguintes:
26/08/24: Camariñas – Vigo (154 km).
27/08/24: Vigo – Porto (151 km).
28/08/24: Porto – Figueira da Foz (139 km).
29/08/24: Figueira da Foz – Serra d’El-Rei – Peniche (142 km).
Cada parada principal nas etapas será aproveitada para encontros oficiais cos alcaldes ou membros das corporacións municipais, co fin de promocionar o encaixe de Camariñas, compartir as tradicións locais e fortalecer os lazos culturais, económicos e deportivos entre as localidades. Na etapa final, está previsto que un club local de ciclismo de Peniche se una ao percorrido, acompañando aos ciclistas de Camariñas durante parte ou a totalidade do traxecto, reforzando así a unión entre estas dúas vilas irmandadas.