8 agosto, 2024
A Deputación da Coruña, a través da súa Biblioteca Provincial e a área de Turismo, lanza o concurso de relatos #HoxeEscriboEn 2024, unha iniciativa que ten como obxectivo fomentar o talento literario, poñer en valor o patrimonio dos concellos da provincia e promover o turismo de proximidade. O concurso está aberto a todas as persoas maiores de idade, que poderán presentar microrrelatos ambientados nalgún dos 93 municipios da provincia da Coruña e optar a premios de estancias rurais.
Os microrrelatos poderán estar escritos en galego ou castelán, sempre que sexan inéditos e non se teñan presentado noutros concursos. A extensión máxima será de 500 palabras, e deberán estar escritos a dobre espazo, con letra Times New Roman de tamaño 12, presentados en papel DIN-A4 e por unha soa cara.
A temática dos relatos debe estar ambientada nalgún concello da provincia, aínda que non é necesario que o autor ou autora resida neles. Os relatos poderán versar sobre a historia local, lendas, tradicións, persoeiros destacados, valores positivos do municipio ou a súa riqueza cultural ou medioambiental, co fin de resaltar calquera aspecto significativo do patrimonio local.
O prazo de presentación remata o sábado 31 de agosto. Os relatos poderán presentarse a través do formulario habilitado na web da Biblioteca da Deputación da Coruña e cada participante poderá enviar varios relatos, cumprimentando un formulario por cada un deles. Para calquera dúbida sobre o concurso, pódese contactar a través do correo biblioteca.info@dacoruna.gal ou do teléfono 981080176.
Neste senso, os premios consistirán en paquetes turísticos. O primeiro premio ofrece unha estancia para dúas persoas dunha noite, con almorzo e cea incluídos, nun establecemento de cabanas rurais da provincia da Coruña. O segundo premio consistirá nunha estancia para dúas persoas dunha noite, con almorzo incluído, nun establecemento rural da provincia. O terceiro premio será unha comida ou cea para dúas persoas nun restaurante da provincia. Ademais, sortearanse varios lotes de produtos locais entre todos os participantes.
As persoas galardoadas recibirán a notificación por teléfono ou correo electrónico, e os resultados publicaranse nas redes sociais e na web da Biblioteca no mes de setembro.