A Coruña será o centro das homenaxes a Luísa Villalta

Como cidade natal da homenaxeada Luísa Villalta, A Coruña será o epicentro da celebración do Día das Letras Galegas no día de hoxe. Un dos actos institucionais principais, ademais do pleno extraordinario da Real Academia Galega, é a inauguración na Casa do Concello da exposición A música das palabras, organizada pola Xunta en colaboración coa editorial Galaxia e que repasa a traxectoria biográfica e profesional da polifacética escritora.

Na mostra recórrese a súa ruta vital, co fin de axudar a comprender quen foi, que nos deixou e que implica a súa figura no panorama contemporáneo cultural de Galicia. O proxecto componse de 14 paneis con textos concisos e divulgativos, acompañados dunha ampla información visual e ten o obxectivo de reflectir a súa traxectoria vital, intelectual e profesional con dous paneis especialmente dedicados á súa relación con A Coruña, a súa ‘Cidade Alta’, incluíndo versos dos seus poemarios e fotografías de Xurxo Lobato.

Tras a inauguración, terá lugar o gran acto institucional aberto ao público que se celebrará ás 11:00 horas no Teatro Colón de A Coruña e que contará coa participación e intervención dos máximos representantes do Goberno galego, da Real Academia Galega e do Concello da Coruña. Ademais, tamén intervirá un membro da familia de Luísa Villalta. A este evento, «aberto á sociedade e que contará con diferentes actuacións musicais», sumaranse tamén autoridades e membros de colectivos e asociacións e entidades vinculadas aos ámbitos culturais e socioeconómicos de Galicia.