19 junio, 2024
A Copa Galicia Elite e Sub-23 de Estrada viviu a súa terceira e penúltima cita este domingo co Gran Premio Concello do Porriño. A carreira organizada polo Club Máster da Louriña ofreceu un percorrido de 137 quilómetros que incluía tres portos de montaña, os dous últimos un dobre paso polo Alto de Abelenda. O sub-23 portugués Lucas Lopes (Supermercados Froiz) venceu en solitario con 27″ de vantaxe respecto ao balear Marc Torres (Padronés-Cortizo), a quen descolgou no treito final da proba. O costarricense Jason Huertas (Lasal Cocinas – Craega) adxudicouse a terceira praza e o triunfo elite ao impoñer a súa punta de velocidade nun grupo de once unidades que rematou a 42″ do primeiro clasificado.
Cos puntos sumados no Porriño, o líder sub-23 Marc Torres xa é o gañador matemático da Copa Galicia na súa categoría. A xeral elite continúa comandada polo seu compañeiro de equipo Carlos Gutiérrez. Este certame coordinado pola Federación Ciclismo Galego pecharase o 10 de agosto en Betanzos coa disputa da 28ª Vuelta a la Comarca Brigantina.