1 agosto, 2024
O campo do río de Ponte Ledesma, en Boqueixón, será o escenario de dúas singulares iniciativas culturais esta fin de semana: a Noite Velada e a Batalla de Ponte Ledesma. Ambos os eventos teñen entrada libre e de balde ata completar aforo.
O venres 2 de agosto, a partir das 21:30 horas, o campo do río de Ponte Ledesma acollerá unha nova edición da “Noite Velada”. Esta iniciativa, organizada polo Departamento de Turismo do Concello de Boqueixón, busca combinar tradición e cultura baixo a icónica imaxe da ponte histórica, que se iluminará novamente coa luz de candeas e teas.
A velada contará coa música dos grupos locais Muxicas da Silveira, Raiera e Cantos da Terra. A entrada é totalmente libre e de balde ata completar o aforo de butacas. Unha vez cuberto, o público pode seguir as actuacións de pé ou sentados no céspede do campo do río. Haberá postos de comida e bebida dispoñibles para quen o desexe.
Dous días despois, o domingo 4 de agosto, ás 20:00 horas, o mesmo escenario acollerá a recreación da histórica “Batalla de Ponte Ledesma”. Este enfrontamento, ocorrido en marzo de 1809, opuxo á veciñanza liderada pola Xunta de Trasdeza ás tropas napoleónicas e resultou nunha vitoria local. A recreación contará coa participación de veciños e veciñas de Boqueixón, así como os “franceses” da Asociación Cultural Heroes de Casaldeirigo (Valga), todos eles dirixidos polo actor Suso Martínez e o músico Manoele de Felisa. A asistencia a este evento tamén é libre e de balde.
Estas dúas iniciativas ofrecen unha oportunidade única para mergullarse na historia e a cultura local nunha contorna emblemática.