Unha vintena de persoas participa nunha visita xeolóxica pola contorna do Pico Sacro

Unha vintena de persoas participaron este pasado sábado no paseo xeolóxico pola contorna do Pico Sacro, unha iniciativa incluída na programación do ciclo “Mes e Pico” e organizado polo Concello de Boqueixón. Este paseo foi guiado por Francisco Canosa Martínez, doutor en Xeoloxía pola Universidade de Oviedo e actual director científico do Xeoparque Cabo Ortegal, quen estivo acompañado polo concelleiro de Turismo, José Luís Mareque Simón.

Anteriormente, o venres á noite, o propio Francisco Canosa impartiu na Capela de San Sebastián a conferencia “O Pico Sacro visto con ollos xeolóxicos”, onde destacou as singularidades do monte Ilicino, unha montaña de cuarzo nun territorio caracterizado polo granito.

Así, este ciclo “Mes e Pico” continuará este venres 21 de xuño cunha observación astronómica dirixida polo físico e divulgador científico Jorge Mira, titulada “A noite do solsticio dende a tumba do dragón”. Esta iniciativa terá lugar na noite máis curta do ano, un momento tradicionalmente considerado máxico. A participación é gratuíta, pero é imprescindible inscribirse previamente no Departamento de Turismo de Boqueixón.

Ademais, o domingo 23 de xuño, ás 13:00 horas, celebrarase a Cerimonia do Lume Sagrado, prevista inicialmente para o pasado domingo pero aprazada polas malas condicións climatolóxicas. Esta celebración celta, encabezada pola raíña Alda e o seu séquito, recuperará simbolicamente a tradición dos nosos devanceiros de obter o lume sagrado directamente do Sol durante o solsticio de verán.

O acto contará coa colaboración da Asociación do Castro da Fervenza de Callobre (A Estrada) e coa actuación do grupo de música tradicional Son de Gaita. As persoas que desexen participar activamente na cerimonia poden solicitar traxes de época ao inscribirse tamén no Departamento de Turismo de Boqueixón.

«O cambio de data na celebración da cerimonia suporá tamén o cambio na entrega do lume sagrado a todas as persoas que o desexen para prender as súas fogueiras da noite de San Xoán. Así, as candeas serán entregadas durante a mañá, ao rematar a cerimonia, e non pola tarde», sinalou o propio Concello de Boqueixón.