Silleda da a benvida ao seu novo arquitecto técnico

Elías González Roma, natural de Cambados, tomou posesión este martes como arquitecto técnico municipal de Silleda, sendo o único aspirante que superou a oposición para unha praza de persoal funcionario de carreira da escala de Administración especial, destinada a cubrir a xubilación do anterior titular.

Este proceso selectivo, sinala o Concello, está destinado a dotar de máis persoal á Concellería de Urbanismo, súmase á convocatoria aberta para cubrir unha praza de enxeñeiro, de nova creación na Relación de Postos de Traballo. Está previsto que este novo enxeñeiro tome posesión en poucos días.

Durante os procesos selectivos, tanto para arquitecto técnico como para enxeñeiro, contouse coa colaboración da Deputación de Pontevedra, completando o tribunal con técnicas provinciais.

“Estamos nun momento importantísimo do noso desenvolvemento urbanístico, co PXOM recén aprobado, polo que é imprescindible que este departamento conte con persoal cualificado”, sinalou a alcaldesa, Paula Fernández. Lembrou tamén que nos últimos meses, a falta de técnicos obrigou a que “as licenzas que se concederon, como a de Culinaria ou a do Velatorio de Bandeira, se fixeran no marco da Lei de Emprendemento da Xunta a través de ECCOM, ou grazas á colaboración da Deputación de Pontevedra, como no caso de Plenoil”.