Primeiras accións informativas da Policía Local de Arzúa dentro da campaña «Arzúa somos todas e todos»

Onte, a veciñanza de Arzúa atopouse cunha sorpresa nos seus vehículos: unha multa. Pero esta non é unha multa común, trátase dunha advertencia que pretende fomentar a reflexión sobre as consecuencias das accións individuais no conxunto da sociedade.

«Esto podería ser unha multa.

Cando estacionamos un vehículo nun lugar indebido, estamos en moitos casos deteriorando o mobiliario urbán, ou impedindo o paso ás persoas, nomeadamente ás máis vulnerables como persoas con mobilidade reducida ou persoas con carriños de bebés.

De seguro que a menos de 50 metros, poderías atopar un sitio onde aparcar correctamente.

Arzúa é de todos e todas, das que imos conducindo e das viandantes.

Arzúa Tamén é túa, coidémola!»  podía lerse na multa simbólica que a policía local, en colaboración co Concello, distribuirá nesta campaña de sensibilización, que durará os vindeiros 15 días. Unha vez rematado este prazo de concienciación, a policía local pasará a sancionar a todo aquel vehículo que esté mal aparcado ou estacionado.

A iniciativa enmárcase dentro da campaña «Arzúa somos todas e todos», promovida polo Concello para sensibilizar á poboación sobre a importancia do respecto ás normas de convivencia e ao espazo público. A acción consiste na colocación de notas informativas nos coches que están mal estacionados, especialmente aqueles que obstruen as beirarrúas, causando un auténtico colapso na mobilidade do concello.

«Sempre defendemos que antes de sancionar é importante concienciar. Queremos formar e informar á veciñanza porque non queremos que isto se entenda como unha medida recadatoria, senón como unha acción que quere que todas e todos tomemos conciencia, asumamos as nosas responsabilidades individuais e cooperemos para mellorar a vida en Arzúa», subliñou Xoán Xesús Carril, alcalde do Concello.

Nos últimos anos, o número de vehículos mal estacionados en Arzúa incrementouse de forma preocupante, obstaculizando as beirarrúas e causando problemas na circulación. Esta medida de concienciación pretende reverter esta tendencia e promover un maior respecto polas normas de circulación e convivencia.

O Concello de Arzúa e a Policía Local fan un chamamento á colaboración veciñal para mellorar a calidade de vida de todas e todos, lembrando que pequenos xestos individuais poden ter un gran impacto positivo no conxunto da sociedade.