Poda de seguridade na Carballeira de Santa Minia, en Brión

Na xornada de onte, o Concello de Brión puxo en marcha as accións acordadas tras a caída de parte dun dos carballos da emblemática Carballeira de Santa Minia o pasado mércores. Así, tal e como se decidiu na reunión cos técnicos encargados do proceso de repoboación da carballeira, procedeuse á revisión física das árbores e iniciouse unha poda de seguridade.

O alcalde, Pablo Lago, explicou que “os traballadores do GES de Brión, baixo as indicacións dos técnicos responsables, están a realizar unha poda das copas e das ramas máis elevadas para fortalecer as árbores e evitar novas caídas”. Uns traballos para os que o GES brionés está a empregar o camión autoescada comprada polo Concello no verán de 2021, que está especialmente preparado para actuacións en altura e é equiparable aos vehículos existentes en calquera parque de bombeiros. A parte principal da poda tivo lugar na xornada de hoxe e rematarase durante esta mesma semana, de acordo coa dispoñibilidade tanto dos traballadores do GES de Brión como do camión autoescada.

Máis tarde, os técnicos procederán á toma de mostras dos carballos de Santa Minia, as cales serán enviadas a un laboratorio especializado que se encargará de determinar o seu estado sanitario.

Unha vez enviadas ao laboratorio, os resultados das análises tardarán en coñecerse un par de meses. Nese momento, según sinlana dende o Concello de Brión, poderán ter unha visión real e actual do estado sanitario das árbores para así tomar a mellor decisión sobre como proceder con elas.

«De momento, o Concello procedeu ao peche temporal da Carballeira de Santa Minia, habilitando camiños seguros ás instalacións municipais que rodean a carballeira (biblioteca, Casa da Cultura, Aula CeMIT…) para que a veciñanza poida acceder a elas con normalidade e sen ningún tipo de risco. Este peche manterase mentres non rematen todos os traballos e se poida garantir a seguridade das persoas», sinalan.

Por mor desto, también foi necesario cambiar as actividades previstas no lugar, como a Andaina Torres de Altamira, unha proba que reunirá este sábado a preto de 800 persoas e que tiña saída e chegada na Carballeira e que agora se trasladou á praza contigua á carballeira, ao pé da rúa Gondar.

«Estas análises buscan confirmar ou negar a presenza de Armillaria Mellea nas árbores, unha enfermidade para a que non hai cura posible e que provoca a putrefacción do sistema radicular do carballo e, en consecuencia, a súa morte por inanición ao non poder absorber nin a auga nin os nutrintes do chan. Este fungo xa ocasionou a retirada dunha ducia de carballos e do terreo da zona sur da carballeira, que foi substituído por nova terra e novos exemplares de carballo de 3 metros de alto», sinalan dende o Concello.