Padrón ofrece Rutas naturais en bici eléctrica polo Monte Santiaguiño

A Concellería de Deportes de Padrón abriu oficialmente o prazo de inscricións para a nova actividade ‘Rutas naturais ao alcance de todos’, unha proposta que consiste en realizar rutas guiadas en bicicleta eléctrica polo entorno do Monte Santiaguiño, ofrecendo unha oportunidade única para descubrir a beleza natural da zona.

Así, as rutas realizaranse os días 23 e 24 de agosto en horarios específicos. O día 23, haberá saídas ás 9:00 e ás 11:00 horas, mentres que o día 24 a saída será ás 9:00 horas. As rutas estarán guiadas por expertos e realizaranse en grupos reducidos, garantindo así unha experiencia máis personalizada e segura.

A actividade está dirixida a persoas maiores de 16 anos e contará con dous niveis de dificultade: baixa, adecuada para principiantes e familias, e media, para aqueles que buscan un reto maior, contando cada unha delas cunha duración estimada de entre 1 e 1,5 horas.

Os participantes poderán desfrutar dun paseo sen esforzo extra grazas ás bicicletas eléctricas, explorando as paisaxes e gozando dunha aventura ao aire libre que combina exercicio físico, aire fresco e natureza. Ademais, esta actividade promove a sostibilidade ao fomentar o uso de bicicletas eléctricas, reducindo o impacto ambiental.