8 mayo, 2024
O Concello do Pino porá en marcha un ano máis un dos programas máis demandados por parte da veciñanza: ‘Vai de Auga’, unha inciativa que une as vantaxes terapéuticas das augas termais coa oportunidade de estreitar lazos e socializar, facilita o desprazamento semanal das persoas do municipio a un balneario.
Como en edicións pasadas, o programa contará con ata cinco sesións no Acquaform Termas de Cuntis con saída dende a Praza do Concello todos os mércores entre o 15 e 29 de maio, así como 5 e 12 de xuño.
O prezo do programa será de 70 euros e incluirá tanto as sesións termais como o desprazamento de ida e volta gratuíto, cun autobús que partirá ás 16.30 horas da Praza do Concello e regresará ao remate da sesión.
As persoas interesadas en recibir información sobre o programa Vai de auga poden chamar á Casa da Cultura ao número de teléfono 981 511 065. A reserva de prazas e a inscrición levarase a caso no rexistro do Concello.
As prazas son limitadas e cubriranse por rigoroso orde de inscrición.
«Cabe recordar que na edición de 2023 uns corenta veciños e veciñas do municipio participaron neste programa. Entre os aspectos que máis agradecen os usuarios e usuarias de Vai de Auga están tanto as vantaxes terapéuticas para moitas das súas doenzas como a posibilidade de manter unha vida un pouco máis activa», sinalan dende o Concello do Pino.