O Pino Aventura viviu a súa terceira edición

Ao redor de sesenta persoas, divididas en 17 equipos, participaron este sábado na terceira edición de O Pino Aventura, actividade ao aire libre que convida a coñecer a pé distintas paraxes naturais do Pino ao tempo que pon a proba os coñecementos, o inxenio e a habilidade dos participantes.

Co campo da igrexa de San Verísimo de Ferreiros como base, a misión dos participantes consistiu en atopar, axudados por un mapa, un total de dezaoito localizacións (máis outra oculta) espalladas pola contorna, así como resolver as probas que se lles propoñían nalgúns dos puntos, consistentes en enigmas relacionados coa lóxica, a literatura, ou a xeografía.

Os grupos nos que se combinaban menores e persoas adultas foron maioría, destacnado así a presenza de familias, e tamén destacou a participación de equipos chegados dende as catro provincias galegas, de lugares como Salceda de Caselas (Pontevedra) ou O Carballiño (Ourense). Uns petiscos rematado o tempo de competición, limitado a dúas horas e media, puxéronlle a guinda a unha xornada de exercicio, diversión e convivencia.

«A proba cumpriu así o obxectivo de promocionar O Pino e atraer novos visitantes», sinalan dende o Concello

Precisamente coa fin de dar a coñecer distintas paraxes, cada ano altérnase o lugar no que se desenvolve O Pino Aventura: foi Arca na primeira edición, A Tarroeira o ano pasado e Ferreiros nesta, o que lle deu a oportunidade aos participantes de facer treitos do Camiño de Santiago, coincidindo cun bo número de peregrinos.