A concelleira de Turismo, Begoña Blanco, fai fincapé en que “no Pazo de Liñares neste primeiro semestre de ano xa se está notando a súa consolidación como lugar de visita e de relación coa contorna e outros puntos turísticos e servizos da contorna”, explica Blanco. Neste sentido subliña que o Pazo “mellorou considerablemente a súa utilización para actos e eventos de todo tipo como vodas, con máis dunha ducia nestes meses, pero tamén con diversos actos como presentacións de libros, sesións de fotos e encontros temáticos, entre outros”.
“No que se refire ás visitas o Pazo recibiu unha afluencia destacada nestes seis meses de ano, un total de 4.000, amosando un incremento respecto ao mesmo período do ano anterior, o que tamén nos pode dar unha idea de como pode rematar o ano sendo previsible superar as 10 mil visitas”, avanza. “Aumentou o número de visitas en grupos, familias, asociacións e excursións procedentes de toda España e incluso de países como Francia e Países Baixos”, puntualiza. Así mesmo, destaca, “tamén foi notable o aumento de excursións de centros educativos de toda Galicia”.
“Cómpre indicar que en moitos casos o Pazo de Liñares funciona como centro de referencia turística onde os visitantes se informan do que poden visitar pola zona”, subliña Blanco.
A responsable municipal de Turismo explica que “o incremento en popularidade e coñecemento do Pazo de Liñares tamén é debido ás propias visitas que recomendan achegarse a coñecer o Pazo de Liñares nas redes sociais e en sitios como Google Maps ou Tripadvisor entre outros, onde as recensións se contan por centos e con puntuacións altas, subindo fotos das instalacións e dos contidos das exposicións”. “O propio Google Maps creou dúas localizacións para o propio Pazo de Liñares, unha co mesmo nome e outra con nome do Museo Galego do Xoguete (Colección A. Chaves) e da Marioneta”, sinala.
“É destacable o éxito da Colección A. Chaves de Xoguetes, posto que é un reclamo fundamental para o Pazo de Liñares xa que moito visitantes de Galicia e do resto do Estado veñen exclusivamente coñecer esta colección composta por máis de mil pezas, algunha delas inéditas”, recalca. “Pero tamén son moitos os que veñen para coñecer a casa onde naceu e viviu o Fillo Ilustre de Lalín, pioneiro da aviación civil Joaquín Loriga Taboada, xa que a súa sala de exposicións é moi completa”, fai fincapé.
Blanco indica que “o Pazo de Liñares tamén recibe numerosas visitas de autocaravanas e de peregrinos que paran no Pazo e selan, así como de camiñantes de toda España que veñen facer rutas que desde aquí se dispoñen”.
Cómpre indicar que en agosto, entre o 1 e o 31 de agosto, establécese a gratuidade de acceso ás instalacións do Pazo, tendo en conta que é un mes de moita afluencia de turistas.
Oficina de turismo
Desde a súa apertura, a comezos de maio, a Oficina de Turismo do Concello de Lalín está a constatar unha tendencia crecente referente a que os visitantes optan por planificar e obter información directamente desde os seus dispositivos móbiles. Así o salienta Blanco que incide que “a Oficina Municipal dispón dunha páxina web de turismo propia con información específica de recursos dividida por seccións e con posibilidade de descarga directa dos distintos folletos e mapas turísticos”, subliña.
A concelleira de Turismo remarca que “a información máis solicitada na Oficina é a relativa a espazos naturais, rutas de sendeirismo e Camiño de Santiago, repetindo a casuística de anos anteriores”. No que toca ás rutas de sendeirismo “unha porcentaxe considerable de turistas solicita información con bastante anterioridade á visita que realizan ao pobo: información xenérica sobre o pobo e arredores para poder planificar a súa estadía no noso pobo ou nalgún caso en concellos limítrofes, recursos próximos, actividades, etc”.
“Así mesmo tamén son bastantes os peregrinos que se interesan principalmente polos espazos naturais e polo Camiño de Santiago, solicitando información específica das rutas xacobeas que discorren polo noso municipio”, precisa.
“A maior parte dos peregrinos que pasan pola Oficina veñen desviados do Camiño de Prata polo desexo de parar no pobo, pois teñen a posibilidade de coller o Camiño de Inverno e enlazar de novo na Vía da Prata na Laxe”, remarca. “Os que fan o Camiño de Inverno paran habitualmente a selar a credencial na asociación de Peregrinus Dezae, que se atopa preto do transcurso da citada ruta”, precisa.
En canto á procedencia, Begoña Blanco sinala que “predominan as visitas de turistas nacionais, especialmente da zona sur de España (Andalucía e Valencia); tamén se rexistraron visitantes estranxeiros sobre todo de Italia e Inglaterra”. “Neste sentido a localización central de Lalín segue a ser un punto clave na elección de destino”, sostén. “A maioría dos visitantes á Oficina de Turismo neste período veñen en parella ou acompañados da familia”, sinala. “Tamén se observaron visitas puntuais de veciños solicitando información concreta sobre rutas e consultas varias relacionadas co pobo”, concreta.
“Como norma xeral repítese a solicitude de indicación de lugares onde comer, sendo a motivación gastronómica xunto coa natureza outro punto forte do destino”, fai fincapé.
A Oficina de Turismo debido á tendencia turística actual de utilización de internet como fonte principal mantén horario de apertura presencial de 11 a 13 horas, dando cobertura de información turística de xeito telefónico polas tardes e durante a fin de semana.
A consulta telefónica recorrente é a solicitude de información sobre o Pazo de Liñares (apertura, horarios, etc.) e tamén se solicita información xenérica sobre o destino, lugares de interese e en xeral a solicitude de envío da información é por correo electrónico.
O perfil tipo do turista/peregrino/visitante mantense como nos últimos anos e responde ao de unha persoa de 35 a 65 anos que viaxa principalmente en familia. O visitante soe chegar a Lalín principalmente en coche particular, aínda que respecto de anos anteriores aumentou o número de visitas que non posuían coche propio, solicitando información específica de conexións de Lalín con outros lugares como Santiago ou Pontevedra.
Incrementar a estadía media
Blanco sinala que “en xeral, predominan aquelas persoas que están no pobo por un día; neste sentido desde o goberno temos claro que unha das prioridades é aumentar a estancia media dos turistas no noso municipio ofertándolle opcións para facer polo menos para dous días, de xeito que se incremente o gasto por turista”.
