17 junio, 2024
O Festival Internacional de Arpa Vila de Noia, coñecido como Noia Harp Fest, presentou hoxe o cartel e a programación da súa 11ª edición, que se celebrará do 8 ao 10 de agosto. Durante tres xornadas, caracterizadas pola ampla diversidade estilística, haberá concertos de folk, jazz e música clásica, coa arpa como protagonista absoluta.
O Noia Harp Fest, apoiado polo Concello de Noia, a Xunta de Galicia a través da Axencia Turismo de Galicia e a Deputación da Coruña, é o único evento do noroeste peninsular centrado na música producida pola arpa a nivel mundial. A diversidade de estilos e públicos é unha das principais características do evento, dirixido por Alba Barreiro, Beatriz Martínez e Rodrigo Romaní. Segundo Romaní, o festival «non se parece a ningún outro, pois reúne unha especial combinación de elementos que lle confire unha personalidade única, con concertos de proximidade e para prazas a ceo aberto, e que non entende de fronteiras».
Na edición de 2024, arpistas e bandas de Alemaña, Escocia, Francia, Senegal e Ucraína formarán parte do cartel, xunto con artistas e colectivos galegos. A música da arpa soará durante tres días en seis escenarios diferentes: Igrexa Museo de Santa María A Nova, Teatro Coliseo Noela, Liceo de Noia, Praza do Tapal, Claustro de San Francisco e Rúa do Curro.
Así, o NHF comezará co Encontro do Alumnado das Escolas de Arpa de Galicia, unha proposta que promove a relación e unidade entre os máis novos instrumentistas do país. Máis de 25 nenas e nenos de distintas localidades galegas tocarán xuntos un tema común como peche do concerto o xoves 8 de agosto no Liceo de Noia. Pola tarde, a Rúa do Curro acollerá a Foliada de benvida ao Noia Harp Fest, con participación de arpistas de SonDeSeu.
A arpista celta alemá Nadia Birkenstock abrirá a xornada do venres 9 ás 19:00h na Igrexa Museo Santa María A Nova. Pola noite, no Teatro Coliseo Noela, actuarán Solomiia Savchuk, unha destacada intérprete ucraína de Bandura, e o dúo escocés Rachel Hair & Ron Jappy, que presentará o seu álbum máis recente, SPARKS, cunha mestura de jigs, reels e marchas de Escocia, Irlanda e Illa de Man.
O sábado 10 de agosto, será afrancesa Camille Levecque quen inaugurará o Claustro de San Francisco como sede do festival cun concerto íntimo. Pola noite, a Praza do Tapal será o escenario para a música experimental de Descofar e Momi Maiga. Descofar, un trío bretón, ofrecerá unha mestura de música bretoa, post-rock e improvisación. O peche estará a cargo de Momi Maiga, virtuoso da kora e compositor senegalés, que presentará o seu disco NIO cun cuarteto que combina kora, violín, violonchelo, percusión e voz, fusionando jazz, flamenco e tradición oral de Senegal.