21 mayo, 2024
O departamento de Bibliotecas Municipais de Ames, dependente da Concellaría de Cultura, segue organizando presentacións de libros dentro do programa Encontros Literarios, unhas presentacións que teñen como obxectivo dar a coñecer tanto novas autoras e autores como obras de escritores xa consagrados entre a veciñanza de Ames. O programa tivo unha ampla participación nas edicións de 2021 e 2022.
Así, este último encontro literario da tempada 2023-2024 contará coa participación da profesora Marga Cancela, que presentará a súa obra máis recente, «O clamor das Virxes», editada por Medulia Editorial. O evento, presentado polo alcalde de Ames, Blas García, terá lugar o mércores 22 de maio no Pazo da Peregrina de Bertamiráns ás 20:30 horas con entrada libre ata completar aforo.
A autora, acida en Ordoeste, A Coruña, Marga Cancela medrou e educouse en Londres e París. É diplomada en Comercio Internacional pola Universidade de Cambridge e licenciada en Filoloxía Inglesa pola Universidade Complutense de Madrid. Ademais, é catedrática de Inglés de Numerarios de Bacharelato e actualmente exerce como profesora en Madrid.
En canto á obra, e dende a perspectiva do realismo máxico, esta recrea a historia dunha das súas tías, Manola Negreira, quen entre 1939 e 1958 deu voz e visibilidade a un grupo de mulleres de aldea que sufriron abusos a mans dos caciques da Galicia máis poderosa.
«O resultado é unha novela sobre un grupo de mulleres que, sen sabelo, foron feministas e que, unha vez superados o medo e a vergoña, loitaron polos seus dereitos», sinalan dende o Concello.